Tung hâi pêi cheăng má péa a Tây Ban Nha, pôa Trần Thanh Mẫn, Kăn xiâm phŏ hnê ngăn Kuô̆k hô̆i hiăng ai rôh tơpui ƀă jâ Cristina Narbona, Kăn xiâm phŏ hnê ngăn Kuô̆k hô̆i râ má môi prếi pôa Alfonso Rodriguez, Kăn hnê ngăn má môi Kuô̆k hô̆i râ má péa. Tung mâu rôh tơpui tơno, pôa Trần Thanh Mẫn tối nhên Việt Nam đi đo ngăn nhuô̆m ƀă rơhêng vâ mơdêk tơrŭm cheăng tung la ngiâ ƀă Tây Ban Nha; mơnhên tối khât mâu tơdroăng ki pêi pro kơhnâ rơkê tung tơrŭm cheăng péa tơnêi têa, péa Kuô̆k hô̆i tung pơla hdrối nah.

Kăn xiâm phŏ hnê ngăn Kuô̆k hô̆i mơnê Tây Ban Nha cho môi tung mâu kong têa EU rĕng kĭ pơkâ rak vế tơdroăng ki ‘no liăn pơla EU – Việt Nam (EVIPA) ƀă pơkâ thế tung hneăng hơnăm pro kăn xiâm hnê ngăn EU, Tây Ban Nha ai rơkong tơpui vâ Kuô̆k hô̆i mâu kong têa EU ki tá hâi kĭ pơkâ EVIPA rĕng kĭ pơkâ tơkêa, pro ivá mơdêk tơrŭm ‘no liăn cheăng pơla péa pâ tung tơdroăng ki tơdâng, rơtế ai pơxúa, veăng kum pro tơ’lêi hlâu ăm khu mơdró kâ châu Âu dế ‘no liăn cheăng – tê mơdró a Việt Nam.