Kơmăng hâi lơ 13/3, a tíu tơbâ Khu lêng hlâ a Gạc Ma a cheăm Cam Hải Đông, tơring Cam Lâm, kong pơlê Khánh Hòa, pôa Trương Tấn Sang, Kăn xiâm hnê ngăn tơnêi têa hneăng hdrối hiăng veăng leh tơbâ 35 hơnăm hâi 64 ngế kăn ƀô̆, mâu lêng tung kuăn pơlê Việt Nam hlâ a chuăn Gạc Ma, cho rơlố Trường Sa.

Veăng leh tơbâ, mâu kăn lăm ngăn tíu tơbâ, mơhiu reăng kơpêng têa, rơtế tơbâ mâu tơdroăng ki trâm ai 35 hơnăm hdrối - Rôh tơplâ a kơxo hâi lơ 14/3/1988 a Gạc Ma hiăng chiâng tơdroăng hơ’muăn dêi hdroâng mơngế cho môi tơdroăng ki hdró ôh tá la lâi kâi piu tung hiâm mơno dêi rêm ngế tung tơnêi têa Việt Nam. A Leh tơbâ, mâu kăn hiăng chôu nhang, pleăng reăng a tíu meăm um chêh inâi tơbâ ƀă kơpong tơnâp tơbâ 64 hơnăm mâu ngế hlâ xuá tơplâ a Gạc Ma.Tung tơdroăng mơđah hơdruê xuâng a hâi leh tơbâ, khu tơkŭm po hiăng tơrŭm ƀă mâu tíu pêi cheăng diâp pri ăm nôu pâ lơ on veăng nhŏng o xiâm ki ai ngế hlâ, diâp hnoăng liăn kum hok tro ƀă diâp hlá cờ tơnêi têa ăm kuăn pơlê ki tơnăng ká.