Kơxo lơ 2/3/2023, a rôh hôp ôh tá xê tiah hmâ má 4, Kuô̆k hô̆i hneăng 15 hiăng séa ngăn, pơkâ ‘na tơdroăng mơngế cheăng tung kăn xiâm rah xo Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam hneăng hơnăm 2021-2026. Ing mê, pôa Võ Văn Thưởng, Ngế cheăng tung khu xiâm kal kí, Kăn hnê ngăn tíu xiâm Đảng hneăng 13, kăn Kuô̆k hô̆i hneăng 15 hiăng châ rah xo pro kăn xiâm hnê ngăn tơnêi têa ƀă kơxô̆ phĭu rah xo ai 487/488 kơxô̆ mâu kăn Kuô̆k hô̆i vâ môi tuăn (tơ‘mô ƀă 98,38%).

Tung mê ƀai pơchuât xo hnoăng pêi cheăng kơ’nâi mê, pôa Võ Văn Thưởng tối ôh tá la lâi pơtê tơmâng mơjiâng ƀă pơtối rak ki rơdêi môi tuăn tâi tâng hdroâng kuăn ngo, vâ tơmâng mâu tơdroăng veăng hnê tối dêi kuăn pơlê, xua kuăn pơlê, xua tơnêi têa dêi rêm ngế Việt Nam ki pâ nhoăm tơnêi têa; hnê  troăng rơhlâ “xo kuăn pơlê pro xiâm”, xo tơdroăng ki pơxúa tro luât ƀă tơtro tơxâng dêi kuăn pơlê cho xiâm ki apoăng, cho tơdroăng pơkâ ki kal dêi mâu luât pơkâ “Tơdroăng ki lâi pơxúa ăm kuăn pơlê, pin thế pêi. Tơdroăng ki lâi ôh tá pơxúa ăm kuăn pơlê pin thế ví”. Khŏm mơ-eăm tơplâ mơdât kâ kơluâ, tơdroăng pro ôh tá tro; pê klêi tơdâng luât pơkâ mơnhông mơdêk krá tơniăn; mơjâng khu kăn tơnêi têa tơdrăng lĕm, krá rơdêi.