Kơxo lơ 10/3, pôa Võ Văn Thưởng, Kăn xiâm hnê ngăn, Kăn xiâm hnê mơhno hiăng ai mâ ƀă xông tơpui a hneăng hôp mơgêi 10 hơnăm pêi pro tiô tơdroăng pơkâ dêi Khu xiâm pơkuâ hnê ngăn Đảng hneăng 11 ‘na hnoăng kring vế tơnêi têa tung chal nếo xua Khu kăn pơkuâ hnê ngăn Đảng Pơlê kong kân Hồ Chí Minh po. Xông tơpui a roh hôp mê, pôa Võ Văn Thưởng hiăng pơkâ thế pơlê kong kân kal athế pêi pro lĕm tro hnoăng cheăng mơjiâng, ‘mâi rơnêu pât Đảng ƀă tơdroăng pơkuâ ngăn cheăng kal kí.

Klêi mê tối nhên, kal athế xo kuăn pơlê cho ki xiâm vâ mơnhông mơdêk, Kăn xiâm hnê ngăn pơkâ thế Pơlê kong kân pơtối thăm mơdêk ‘na túa lĕm tro, pơlê pơla, hnê hriâm ƀă hnê mơjiâng tuăn ngôa rơkê, khăm pơlât, mơdêk tơdroăng ki rơkê plĕng, tơdroăng kum kuăn pơlê pêi lo tơmeăm khoăng; mơhnhôk tơrŭm krá kâk tung kuăn pơlê, vêh mơnhông hiâm mơno veăng kring vế tơnêi têa krá khâp.

Kăn xiâm hnê ngăn tơnêi têa pơkâ thế Pơlê kong kân Hồ Chí Minh pơtối mơdêk tơdroăng ki ai tơ’lêi hlâu, hnoăng tơná, tíu tơná tung tơrŭm cheăng tơpui kâ ƀă kong têa ê, thăm mơdêk tung tơrŭm pêi cheăng kâ, pêi lo hên kế tơmeăm ƀă tơrŭm hên ƀă mâu kong têa tung lâp plâi tơnêi, malối ƀă mâu kong têa ối tung kơpong Mekong, mâu kong têa tung ASEAN ƀă mâu khu ngế ki pêi cheăng kâ kân.