Kơxê hâi lơ 17/3, a tíu pêi cheăng dêi Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa tơdah Kăn teăng mâ Australia a Việt Nam. Tối tơdroăng phiu ro tơdah kăn teăng mâ kong têa ê rôh apoăng châ to pro kăn nếo, pôa Võ Văn Thưởng hâk mơnê mâu hnoăng veăng ‘no hên dêi Kăn teăng mâ Australia riân sap xo hnoăng cheăng pêi a Việt Nam ƀă hên tơdroăng tơpui kâ ai pơxúa, veăng ‘no hnoăng ‘mâi mơnhông ƀă mơdêk tơrŭm cheăng pơla Việt Nam - Australia.

Kăn xiâm hnê ngăn tơnêi têa khĕn kơdeăn hnoăng pêi ki tơƀrê dêi Australia, malối cho tung tơdroăng ‘mâi mơnhông mơdêk cheăng kâ klêi kơ’nâi pơreăng kân ƀă loi nhoăm tơnêi têa Australia kô rế mơnhông mơdêk, pê klêi hên tơdroăng cheăng tung la ngiâ. Việt Nam mơnê Australia cho kong têa ki tŏng kum vaccine hên má péa hiăng kum Việt Nam 26,4 rơtuh klŏng vaccine hbrâ mơdât COVID-19, ing mê veăng kum Việt Nam kâi mơdât pơreăng, rĕng châ mơnhông cheăng kâ - rêh ối.