Kơxê lơ 2/3, a Tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa trâm kăn pơkuâ, kăn ƀô̆, kong chưk, viên chưk, mâu ngế pêi cheăng tung Ƀơrô cheăng Kăn xiâm hnê ngăn tơnêi têa. Tơpui a rôh trâm mâ, pôa Võ Văn Thưởng tối hâk tơngăm ƀă hnoăng cheăng kân kĭn khât drêng châ Khu pơkuâ ngăn Tơnêi têa, kăn xiâm pơkuâ hnê ngăn Đảng Nguyễn Phú Trọng, mâu vâi pú kăn pơkuâ Đảng, Tơnêi têa loi tơngah pôk ƀă Kuô̆k hô̆i loi tơngah diâp rôh mơnhông tơnêi têa ƀă kuăn pơlê tung hnoăng cheăng Kăn xiâm hnê ngăn tơnêi têa.

Kăn xiâm hnê ngăn tơnêi têa tối nhên troh tơdroăng pơkâ thế, ki kal tung tơdroăng ki hlê plĕng ‘na troăng prôk mơnhông dêi hdroâng mơngế, dêi tơnêi têa, ‘na mâu hnoăng cheăng ki tâi tâng Đảng, tâi tâng kuăn pơlê ƀă tâi tâng khu lêng athế mơ-eăm pêi pro tung la ngiâ xuân môi tiah hnoăng cheăng ki kân a ngiâ Đảng, Tơnêi têa ƀă kuăn pơlê ki Kăn xiâm hnê ngăn tơnêi têa athế mơ-eăm, khŏm mơeăm pêi pro tiô luât pơkâ.

Đi đo tối tơdrăng tơmâng mâu rơkong tơpui tối, bro dêi kuăn pơlê pâ nhuô̆m tơnêi têa, pôa Võ Văn Thưởng, kăn xiâm hnê ngăn tơnêi têa rơhêng vâ châ xo mâu rơkong veăng tí tăng ‘nâi plĕng, pơkâ mơ’no sap ing hiâm mơno, hnoăng cheăng pôu râng dêi kăn ƀô̆, khu ki rơkê Ƀơrô cheăng kăn xiâm hnê ngăn tơnêi têa ƀă tơdroăng cheăng mơjiâng ƀă mơnhông tơnêi têa.