Kong măng lơ 9/2, a pơlê kong kơdrâm Kon Tum, Khu pơkuâ hnê ngăn Đảng – Hô̆i đong hnê ngăn – Vi ƀan hnê ngăn – Vi ƀan xiâm Măt trâ̆n Tơnêi têa Việt Nam kong pơlê Kon Tum tơkŭm po kân krip Leh tơbâ 110 hơnăm mơjiâng kong pơlê Kon Tum (09/02/1913- 09/02/2023). Pôa Võ Văn Thưởng, ngế cheăng tung tíu xiâm kal kí, kăn pơkuâ hnê ngăn xiâm Đảng veăng ai mâ, tơpui hnê mơhno a rôh leh.

Tơpui a rôh Leh, pôa Võ Văn Thưởng tối nhên: Vâ kong pơlê Kon Tum pơtối mơnhông rĕng, krá tơniăn, pôa pơkâ mơ’no mâu tơdroăng ki kal vâ mâu khu râ, pơkuâ cheăng, khu tơrŭm Đảng, khu kăn pơkuâ, Măt trâ̆n Tơnêi têa, khu pú hên kong pơlê Kon Tum tơmâng ngăn tung la ngiâ, mê cho: Mâu khu râ, pơkuâ cheăng, khu tơrŭm Đảng, rêm ngế kăn ƀô̆, đảng viên ƀă kuăn pơlê hdroâng kuăn ngo tung kong pơlê kal mơdêk tŭm hnoăng cheăng, tíu cheăng, mâu tơdroăng ki ai hlâu, ki pơxúa, rơtế ƀă mâu tơdroăng ki xơpá, pơloăng mơnúa dêi kong pơlê; mơdêk khôi hmâ mơhno túa lĕm tro, ton nah, kăch măng dêi kong pơlê, mơdêk rơdêi hiâm mơno, tơdroăng ki púi vâ kơdo mơ-eăm, bro tơdroăng ki mê chiâng ivá rơdêi, chiâng tơdroăng pêi pro dêi rêm khu tơrŭm Đảng, dêi rêm ngế kăn ƀô̆, đảng viên ƀă kuăn pơlê, tơdjuôm ivá, môi hiâm mơno, tơkâ luâ xơpá mơjiâng pơlê cheăm Kon Tum mơnhông rĕng, krá tơniăn ƀă hơniâp lĕm tâ.