A hneăng hôp tơpui tơno, mâu kăn teăng mâ tơkŭm tơpui tơno mâu tơdroăng pơxá: Mơnhông krá tơniăn ƀă mơdêk ki kơnâ Việt Nam tung pêi ki kơnâ lâp plâi tơnêi; tơdjêp hê̆ sinh thái tơmeăm, tê mơdró kŏng ngê̆ kơxô̆ Make In Viet Nam tung tơnêi têa ƀă kong têa ê; troăng pêi ton xŏn mơnhông mơdêk khu tê mơdró kŏng ngê̆ kơxô̆ tung tơnêi têa, pơkâ troăng tơleăng mâu tơdroăng tung mơnhông khu tê mơdró kŏng ngê̆ kơxô̆ a Việt Nam, ti tăng roh tơ’lêi môi tiah troăng ti tăng kơchơ mơdró a kong têa ê.

Xông tơpui a hneăng hôp tơpui tơno pôa Vũ Đức Đam tối nhên, tung la ngiâ mâu khu tê mơdró Việt Nam kal tơdjêp mơjiâng khu pêi cheăng ai ngế pơkuâ djâ, rŭm môi tuăn chiâng ivá ó rơdêi, rơtế dêi pó khên tơnôu tâ, lo a kơchơ tê mơdró kong têa ê ƀă hiâm mơno loi tơngah.