Kơxo lơ 14/3, pôa Vương Đình Huệ, Kăn xiâm hnê ngăn Kuô̆k hô̆i lăm pôu, pêi cheăng a Hưng Yên. Pôa Vương Đình Huệ rơtế ƀă khu râ kăn pêi cheăng troh pleăng hơvĭng reăng a Um meăn pôa Nguyễn Văn Linh, Kăn xiâm pơkuâ hnê ngăn Đảng hneăng hdrối (a pơlê kong kơdrâm Hưng Yên, kong pơlê Hưng Yên).

Pôa Nguyễn Văn Linh cho hok tro ki rơkê dêi Pôa Hồ Chí Minh, Kăn xiâm hnê ngăn tơnêi têa hneăng apoăng, cho ngế ai hnoăng kân tung tơdroăng pêi cheăng kăch măng Việt Nam, cho Kăn xiâm pơkuâ hnê ngăn cheăng Đảng apoăng dêi Đảng pin tung rơxông pơ’lêh nếo.

A cheăm Quảng Lãng (tơring Ân Thi, kong pơlê Hưng Yên), Kăn xiâm hnê ngăn Kuô̆k hô̆i ƀă khu râ kăn pêi cheăng troh veăng Leh pơxiâm pro kơpong hngêi kơmăi kơmok kơxô̆ 5 kong pơlê Hưng Yên. Kơpong hngêi kơmăi kơmok kơxô̆ 5 cho môi tơdroăng tơkêa bro ki xiâm dêi kong pơlê Hưng Yên, ai tâi tâng ƀăng deăng lối 192 ha, ƀă tâi tâng kơxô̆ liăn kĭ apoăng lối 2.300 rơtal liăn, ối tung mâu tơring Ân Thi, Kim Động.

Klăng leh tơbâ 77 hơnăm hâi tơ’noăng ivá Việt Nam lơ 27/3, Kăn xiâm hnê ngăn Kuô̆k hô̆i ƀă khu râ kăn pêi cheăng hiăng lăm pôu Tíu xiâm hnê mơjiâng kơtú ƀa long mâu ngế hơnăm ối nếo dó inâi PVF. A kố, pôa Vương Đình Huệ rơtế ƀă khu râ kăn pêi cheăng lăm ngăn mâu kế tơmeăm dêi Tíu xiâm; tơmâng tơbleăng ‘na tơdroăng pêi cheăng dêi Tíu xiâm ƀă diâp kơxuô tơmeăm, diâp mơhnhôk Tíu xiâm, khu kăn ƀô̆, mâu ngế rơkê, mâu ngế ki hnê, mâu ngế pêi cheăng, mâu Kâu lăk ƀô̆, mâu muăn hriâm, mâu ngế kơtú ƀa long hơnăm ối nếo dêi PVF ƀă Kâu lăk ƀô̆ Kơtú ƀa long Kŏng an Hà Nội.