Tơmiât troh leh tơbâ 92 hơnăm Hâi mơjiâng Đoân Droh rơtăm Kŏng san Hồ Chí Minh (26/3), kơxo lơ 21/3, pôa Vương Đình Huệ, Kăn xiâm hnê ngăn Kuô̆k hô̆i hiăng ai roh pêi cheăng ƀă Khu xiâm pơkuâ hnê ngăn Đoân Droh rơtăm Kŏng san Hồ Chí Minh. Xông tơpui a roh pêi cheăng, pôa Vương Đình Huệ kheăn kơdeăn tơdoăng Khu xiâm Đoân rah xo tơdroăng pêi cheăng hơnăm 2023 ƀă tơdroăng pơxá Khế droh rơtăm ƀă tơdroăng ‘’pơ’lêh pêi cheăng xúa kŏng ngê̆ kơxô̆’’.

Kố cho hnoăng cheăng ki kal, thâ, tơxâng tiô tơdroăng tơdjuôm dêi rơxông, djâ tơnêi têa pin mot tơrŭm trâu hơngế tung tơdroăng mơnhông mơdêk tơdjuôm dêi lâp plâi tơnêi. ‘Na hnoăng cheăng Đoân ƀă tơdroăng droh rơtăm, vâi o phô̆m xông kân tung la ngiâ, Kăn xiâm hnê ngăn Kuô̆k hô̆i pơkâ thế, Khu xiâm pơkuâ Đoân droh rơtăm Kŏng san Hồ Chí Minh kal pơtối hriăn plĕng, hlê plĕng trâu hơngế tâ mâu troăng tơmiât pêi, troăng hơlâ ki kal ‘na tơdroăng pêi cheăng droh rơtăm tung Pơkâ Hneăng hôp má XIII dêi Đảng, vâ pơtối séa ngăn, pêi i nhên rêm hnoăng cheăng ki nhên tơtro ƀă pơkâ ƀă tơdroăng ai khât nôkố.

Pơtối mơ-eăm mơjiâng mâu ki kơnâ ƀă tơdroăng djâ troăng ahdrối tung droh rơtăm tung rơxông nếo ‘’hiâm mơno lĕm, tuăn ngôa bâ eăng, ai tơdroăng tơmiât vâ pêi kân’’. Khu pơkuâ tơdroăng cheăng Đoân ƀă droh rơtăm thế cho mâu ngế djâ troăng ahdrối tung tơdroăng pơ’lêh pêi cheăng xúa kŏng ngê̆ kơxô̆ tơnêi têa, cheăng kâ xúa kŏng ngê̆ kơxô̆.