Kơxo lơ 7/2, pôa Vương Đình Huệ, Kăn xiâm hnê ngăn Kuô̆k hô̆i pơkuâ po rôh pêi cheăng ƀă mâu kơ koan ki ối tung Vi ƀan pơkuâ Kuô̆k hô̆i ƀă Ƀơrô cheăng Kuô̆k hô̆i. ‘Na mâu tơdroăng ki xiâm tung hnoăng cheăng ki kal tung khế 2, kăn xiâm hnê ngăn Kuô̆k hô̆i pơkâ thế mâu kơ koan tơkŭm hbrâ tro ăm Rôh hôp dêi Vi ƀan pơkuâ Kuô̆k hô̆i (tiô tối hdrối kô ton tung pơla 4 hâi). Môi tơdroăng ki kal xiâm ki ê mê cho Rôh hôp lâp tơnêi têa mơgêi hnoăng cheăng Hô̆i đong hnê ngăn kuăn pơlê mâu kong pơlê, pơlê kong kân ối tung Tơnêi têa (tiô tối hdrối kô tơkŭm po a Quảng Ninh).

‘Na mâu hnoăng cheăng tung pơla sap ing khế 1 troh khế 3 ƀă plâ hơnăm, pôa Vương Đình Huệ, kăn xiâm hnê ngăn Kuô̆k hô̆i pơkâ thế Vi ƀan Luât pơkuâ bro tơdroăng mơjiâng luât, luât pơkâ hơnăm 2023, ‘mâi rơnêu Tơdroăng mơjiâng luât, luât hơnăm 2023, mâu kơ koan ki ê hbrâ rơnáu tơrŭm ƀă mâu kơ koan tơrŭm cheăng pơkâ mơ’no mâu tơdroăng tơkêa vâ pơtroh ăm Khu pơkuâ Kuô̆k hô̆i, Kuô̆k hô̆i tiô hnoăng pơkuâ.