Kơxê lơ 7/3, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i tơdah kăn teăng mâ Liên đoân mâu khu tơrŭm cheăng kâ Nhuk (Keidanren) dế lăm pôu, pêi cheăng a Việt Nam ƀă veăng Hneăng hôp tơpui tơno cheăng kâ khu râ kăn xiâm Việt Nam – Nhuk klăng leh tơbâ 50 hơnăm mơjiâng tơpui kâ Việt Nam – Nhuk (21/9/1973 – 21/9/2023).

Xông tơpui a roh tơdah, pôa Vương Đình Huệ, Kăn xiâm hnê ngăn Kuô̆k hô̆i tối ăm ‘nâi, tung la ngiâ, Kuô̆k hô̆i Việt Nam kô tơbleăng ăm pêi pro mâu luât ki kal, môi tiah tơdroăng tơkêa bro Luât Tơnêi tơníu (‘mâi rơnêu), Luât tê mơdró tơnêi (‘mâi rơnêu), Luât ‘mâi rơnêu, tơ’nôm mâu troăng dêi Luât Mâu khu ăm mung liăn, Luât mơnhông mơdêk kơmăi kơmok. Kăn xiâm hnê ngăn Kuô̆k hô̆i pơkâ thế, Keidanren rơtế mâu khu tê mơdró Nhuk tơmâng tŏng kum ƀă veăng tơpui pâ thế vâ Kuô̆k hô̆i Việt Nam pêi kêi đeăng mâu tơdroăng tơkêa bro luât ki kal kố.

Teăng mâ Keidanren tơkêa kô rơtế mâu khu tê mơdró Nhuk mơ-eăm tâi ivá tơná veăng kum ăm tơdroăng mơnhông mơdêk dêi tá Việt Nam ƀă Nhuk tung la ngiâ, kum rơtế Chin phuh Việt Nam pêi pro mâu ki hiăng pơkâ mơ’no.