Kơxo lơ 28/2, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i tơdah Kăn xiâm phŏ hnê ngăn Kuô̆k hô̆i kong têa Lếo cho pôa Khambay Damlath dế rơtế Khu râ kăn teăng mâ Kuô̆k hô̆i kong têa Lếo lăm pôu pêi cheăng a Việt Nam. Pôa Vương Đình Huệ rơkâu mâu tơdroăng châ tơƀrê kân, tâi tâng ki Đảng, Tơnêi têa Lếo tối tơdjuôm, Kuô̆k hô̆i Lếo tối krê hiăng châ tơƀrê tung pơla kố nah; kheăn kơdeăn tơdroăng ki khu râ kăn rơhêng vâ ‘nâi plĕng tung roh lăm pôu pêi cheăng kố, mê cho ‘na khu râ kăn pơkuâ, tơdroăng pêi cheăng dêi Khu râ kăn xiâm ƀă kong pơlê.

Pôa Vương Đình Huệ mơnhên, Kuô̆k hô̆i Việt Nam đi đo hbrâ tơpui tơno túa ki rơkê tơtro ƀă Kuô̆k hô̆i Lếo ƀă xuân pói vâ ti tăng plĕng túa pêi rơkê kố, túa ki kơnía dêi peăng pú hmâ vâ Kuô̆k hô̆i Việt Nam pêi cheăng rế hía rế châ tơƀrê tâ.

Tung hơnăm 2023, Kuô̆k hô̆i Lếo kô tơkŭm pơ’lêh nếo troăng pêi cheăng ƀă mơdêk ki dâi lĕm pêi cheăng, tơkŭm po xo phĭu ki loi tơngah ƀă ngế râng tíu pêi cheăng xua Kuô̆k hô̆i Lếo rah xo, kĭ ăm pêi pro tung hơnăm 2023.