Kơxê măng lơ 14/2, pôa Vương Đình Huệ, kăn xiâm hnê ngăn Kuô̆k hô̆i hiăng tơdah Khu kăn mơdró kâ dêi Khu tơrŭm Tê mơdró EU-ASEAN. Tơpui a rôh trâm mâ, pôa Vương Đình Huệ, kăn xiâm hnê ngăn Kuô̆k hô̆i tối nhên, Việt Nam ngăn nhuô̆m, mơnhên tối khât, tơdrêng a mê hlối rơhêng vâ mơdêk tơrŭm cheăng ƀă Khu tơrŭm châu Âu (EU).

Hô̆i đong Tê mơdró EU-ASEAN pơtối mơdêk hnoăng cheăng ki kal, bro ivá tíu ki tơdjêp loi tơngah, tŏng kum ăm khu mơdró kâ ƀă mâu khu ki ‘no liăn cheăng EU tung ASEAN tối tơdjuôm ƀă kơchơ tê mơdró Việt Nam tối krê. Kăn xiâm hnê ngăn Kuô̆k hô̆i tối nhên, Kuô̆k hô̆i Việt Nam, tung mâu tơdroăng pơkâ dêi tơná, pơrá xúa pơkâ bro tơdroăng mơnhông rĕng ƀă krá ton, mơdêk tơdroăng tơrŭm rế hía rế kơhnâ, tơƀrê dêi Việt Nam tung kơpong ƀă lâp plâi tơnêi.

Kố cho pơkâ đi đo, malối tung 76 hơnăm Kuô̆k hô̆i xuân môi tiah Kuô̆k hô̆i hneăng 15. Kuô̆k hô̆i xo khu mơdró kâ, kuăn pơlê cho tíu cheăng ki xiâm tung mâu tơdroăng pơkâ.