Tung rôh lăm pôu Australia, kơxo lơ 1/12, pôa Vương Đình Huệ, Kăn xiâm hnê ngăn Kuô̆k hô̆i hiăng trâm mâ pôa Jason Clare. Kăn xiam hnê ngăn Kuô̆k hô̆i tối mâu tơdroăng ki kal tơdjuôm tung tơrŭm cheăng pơla péa tơnêi têa, tơrŭm hnê hriâm - hnê mơjiâng tuăn ngôa rơkê cho kal khât ƀă rế ton rế mơnhông mơdêk. Ƀă lối 30.000 ngế sinh viên ƀă tí tăng ‘nâi plĕng dêi sinh viên Việt Nam ki dế hriâm a Australia, tơrŭm hriâm ôh tá xê to veăng ‘no hnoăng mơnhông tơƀrê mơngế pêi cheăng dêi Việt Nam ƀă cheăng kâ Australia mê ối cho kơxái  mơhno ki lĕm tro krá kak, cho tíu tơrŭm pơla kuăn pơlê péa tơnêi têa.

Ngế xiâm ngăn hnê hriâm kong têa Australia ăm ‘nâi: Việt Nam nôkố ối má pŭn ‘na kơxô̆ hok tro, sinh viên hriâm a Australia ƀă đi đo loi khât a mâu rôh tơrŭm cheăng kân tung kơvâ hnê hriâm ƀă hnê mơjiâng tuăn ngôa rơkê pơla péa tơnêi. Péa pâ tối tiah kố, tơdroăng tơkŭm po Hneăng hôp tơrŭm cheăng hnê hriâm dêi Việt Nam - Australia drêng lăm pôu Australia dêi Kăn xiâm hnê ngăn Kuô̆k hô̆i cho tơdroăng pêi pro ai pơxúa khât, veăng mơdêk tơrŭm hnê hriâm - ƀă hnê mơjiâng tuăn ngôa rơkê pơla péa tơnêi têa.