Kơxê lơ 30/11, tung roh lăm pôu pêi cheăng a kong têa Australia, pôa Vương Đình Huệ, Kăn xiâm hnê ngăn Kuô̆k hô̆i hiăng tơdah Kăn xiâm Kuô̆k hô̆i râ má môi Don Farrell, Ngế xiâm pơkuâ tê mơdró ƀă ôm hyô Australia. Pôa Vương Đình Huệ, Kăn xiâm hnê ngăn Kuô̆k hô̆i ƀă pôa Don Farrell, Ngế xiâm phiu ro hlo, tung pơla pơreăng kân COVID-19 pơla kố nah, tơrŭm cheăng tê mơdró pơla péa tơnêi têa xuân tâk rơdêi. Tiô tối hdrối hơnăm kố, pêi lo liăn tê mơdró kô châ 15 rơtal dollars, Việt Nam cho khu tơrŭm cheăng tê mơdró kân má 10 dêi Australia.

Kăn xiâm hnê ngăn Kuô̆k hô̆i pói vâ péa pâ pơtối pro tơ’lêi hlâu ăm khu tê mơdró, khu mơ’no liăn cheăng péa tơnêi têa ƀă tối tơbleăng tung roh lăm pôu pêi cheăng roh kố, Việt Nam ƀă Australia kô tơkŭm po Hneăng hôp tơrŭm cheăng kâ ƀă Hneăng hôp tơpui tơno tơrŭm cheăng hnê hriâm.