A rôh trâm mâ, pôa Vương Đình Huệ, Kăn xiâm hnê ngăn Kuô̆k hô̆i tối nhên, 40 hơnăm hdrối, Khi vâi kơdrâi Khu xiâm Kŏng an ôh tá la lâi pơtê mơnhông mơdêk tŭm tơdroăng, sap tơdroăng tơrŭm, luât pơkâ cheăng troh kơxô̆ mơngế tung khu ƀă tơdroăng cheăng pêi tơƀrê ƀă mơnhông mâu tơdroăng mơhnhôk cheăng dêi vâi kơdrâi.

Khu kố hlối cho tíu ki vâ rêm ngế hriâm pât, mơhnho tơná, hlối cho xiâm mâ mơhnhôk vâi nâ o tơrŭm krá mơ-eăm pleăng hnoăng tơná ƀă ôh tá la lâi pơtê ki rơkê, ƀă mâu tơdroăng mơhnhôk ôh ti xê to  pơ-ô pơ-eăng tung pơlê pơla, mê ối mơhno ki lĕm khât ‘na um méa dêi ngế kơdrâi Kŏng an kuăn pơlê, mê cho: Tơdroăng mơhnhôk “Pái kơhnâ”, tơdroăng mơhnhôk “Vâi kơdrâi Kŏng an rơkê cheăng tơnêi têa, kơhnâ pêi viâ mâu tơdroăng cheăng tung hngêi ƀă hên ki ê.

Sap tơdroăng mơhnhôk mê, hlo hên mâu ngế kơdrâi Kŏng an khên tơnôu, hên vâi nâ o chiâng mơngế ki rơkê, khu cheăng khoa hok ki rơkê, nhoăm pâ tung kơvâ cheăng ƀă tung pơlê pơla; kơxô̆ vâi kơdrâi kăn ƀô̆  châ rah xo pêi hnoăng cheăng pro kăn rế tâk hên. Kăn xiâm hnê ngăn Kuô̆k hô̆i tối, hdrối tơdroăng pơkâ thế mơnhông mơdêk nếo tơnêi têa, Đảng, Tơnêi têa pin rế tơmâng khât troh tơdroăng mơnhông tâi tâng ƀă trâu rơdâ ƀă vâi kơdrâi tơnêi têa pin, ki xiâp pêi cho tơdroăng cheăng vâi kơdrâi, xua tơdroăng pơkâ ôh tá pơrah vâi kơdrâi, hơniâp lĕm ƀă rế rơkê dêi vâi kơdrâi.

Kăn xiâm hnê ngăn Kuô̆k hô̆i pơkâ thế, kăn ƀô̆, mâu ngế vâi kơdrâi Kŏng an mơ-eăm hriâm tâp, rơkê plĕng, ƀĕng ƀeăn tung tơdroăng cheăng, tơkâ luâ xơpá pơloăng pơmúa, pôi ta pơrah kơdrâi.