Kơxê lơ 27/3, pôa Vương Đình Huệ, Kăn xiâm hnê ngăn Kuô̆k hô̆i hiăng tơpui tơno mơ’no tơdrêng tung um tiô troăng măng ƀă pôa Triệu Lạc Tế, Kăn xiâm hnê ngăn Kuô̆k hô̆i kong têa Sinuâ. A roh tơpui tơno, pôa Vương Đình Huệ pơkâ thế Sinuâ tơmâng hên tâ, po rơdâ rôe tơmeăm khoăng, ki má lối cho tơmeăm pêi lo ing chiâk deăng ki rơdêi dêi Việt Nam, pro tơ’lêi hlâu ăm tơmeăm khoăng Việt Nam châ tê a kong têa má 3 hluâ troăng rơxế lơtreng châu Á – Châu Âu; pêi pro rĕng mâu tơdroăng tơkêa bro mơ’no liăn cheăng kân, dâi lĕm, má môi ăm tơdroăng mơnhông dêi kong têa Sinuâ a Việt Nam; thăm tơdjêp troăng klông vâ kum ăm tơdroăng prôk lăm dêi kuăn pơlê péa tơnêi têa.

Pôa Triệu Lạc Tế pơkâ thế péa pâ thăm trâm mâ tơpui tơno châ a chê ƀâng ‘na Đảng, ki rơhêng vâ tối cho tơpui tơno troăng pêi ton xŏn pơla Khu râ kăn pơkuâ hnê ngăn cheăng Đảng râ kăn xiâm vâ pơkâ troăng pêi la ngiâ ăm tơrŭm cheăng pơla péa Đảng, péa tơnêi têa; thăm pêi pro tơdroăng tơkêa bro ‘na mơ’no liăn cheăng; mơnhên Sinuâ hbrâ pro tơ’lêi hlâu vâ tơmeăm pêi lo ing chiâk deăng Việt Nam po rơdâ tê ngi kong têa Sinuâ.