Pơtối lăm pôu kong têa Australia, peăng xêi hâi lơ 2/12 (tiô chôu kong têa kố), a tíu pêi cheqăng dêi Hngêi trung Đăi hok RMIT, pơlê kong kân Melbourn, kong pơlê kân Victoria, pôa Vương Đình Huệ, Kăn xiâm hnê ngăn Kuô̆k hôi hiăng veăng hôp ‘na pêi cheăng kâ pơla Việt Nam ƀă Australia. Xông tơpui a hneăng hôp, pôa Vương Đình Huệ tối nhên, tơrŭm cheăng kal kí cho tơdroăng cheăng ki tơxâng loi tơngah ƀă lĕm tro pơla péa kong têa cho ki xiâm ăm hnoăng mơnhông tơrŭm cheăng tung hên kơvâ cheăng pơla Việt Nam ƀă Australia.

Tâng tơrŭm cheăng lĕm tro, loi tơngah ‘na cheăng kal kí, ‘na tơpui kâ cho ki xiâm, mê tơdroăng trâm mâ, tơpui tơno pơla kuăn pơlê xuân cho tơdroăng cheăng ki xiâm  thăm mơdêk ó rơdêi tâ. Trâm mâ, tơpui tơno xuân cho roh ki vâi krâ-nhŏng o pơla péa pâ tơnêi têa veăng lăm pôu ôm hyô dêi pó, mơdêk tơdroăng ki pêi lo liăn ngân ing ôm hyô.

Tung mê, pơlê pơla Việt Nam a Australia ai dâng 350 rơpâu ngế, cho kong têa ki kân má 5 dêi kong têa ê a Australia. Pôa Vương Đình Huệ ai tối tiah kố, kố cho mâu tơdroăng ki mâu ngế ki veăng vâ tơrŭm pro nhŏng o,thăm mơdêk tơdroăng tơrŭm cheăng pơla peá pâ tơnêi têa, mê tơdroăng tơrŭm pêi cheăng kâ, tê mơdró ƀă mơ’no liăn cho ki xiâm kal kân khât vâ mơnhông tơrŭm cheăng pơla peá pâ.