Bú tiê péa pái xôh tơ’lêi hlâu tê a phôn râng kŏng ki rơkê, mơhé  ối a hngêi lơ ối achêk kơphế, pôa Y Minh Niê, ối a ƀuôn H’Đing, cheăm Ea Tul, kong pơlê Dak Lak xuân tơ’lêi ăm liăn rôe phon, pơkeăng xôh kơdê nhâ, ôa hdrong lơ nâp liăn on tơhrik, liăn têa. Tiô pôa Y Minh, ƀă ứng dụng hngêi rak liăn châ cài ‘’măn a phôn râng kŏng, bú kal tơdjêp internet tê ôh tá xê to hiăng nâp liăn tơ’lêi hlâu mê ối châ ‘nâi pêi pro hên tơdroăng ki ê, tê mơdró ƀă kơxô̆ liăn bú iâ, thăm nếo ki ‘nâ ôh tá xo liăn.  

“Hdrối nah, hâi teăm ai app mê a lăm troh a hngêi rak liăn, kơ’nâi mê a pơtroh liăn ƀă tài khoản ƀă điê̆n tưh ƀă phôn râng kŏng tơ’lêi hlâu tâ. Ai app hngêi rak liăn a châ kơdĭng dêi hâi chôu ƀă ôh tá êa lăm troh a hngêi rak liăn, ối a hngêi xuân chiâng pơtroh liăn ƀă tài khoản điê̆n tưh’’.

‘Na jâ Nguyễn Thị Mỹ, ngế pơkuâ rơpŏng mơdró kâ tơmeăm mơjiâng hngêi trăng, tơmeăm xah a thôn 5, cheăm Ea Tul, kơnôm xúa ứng dụng hngêi rak liăn xô̆, tơdroăng ăm liăn rôe tơ’lêi hlâu tâ, séa ngăn kơxô̆ liăn châ xo tơ’mot nhên tâ, malối ôh tá êa djâ liăn mâ, mê kô pơtroh a theh hngêi rak liăn ƀă ngăn mê môi tiah kơtong tâ liăn ki kŭn. Jâ Mỹ xuân cho “tơmối ki hmâ” dêi hngêi rak liăn ƀă kơxô̆ liăn mung lối 4 rơtal liăn.

“Mung liăn hngêi rak liăn hiăng 10 hơnăm kố, Agribank gum mung vâ mơnhông cheăng kâ. Pro hlá mơ-éa hlâu, rĕng, tơ’lêi, xo liăn tâ tung tài khoản. Hdrối nah ối thế lăm nâp tơdrêng a tíu nâp liăn, nôkố  ăm liăn rơkâ bú pơtoh liăn ƀă tài khoản, pơtih hâi lơ 30 thế ăm liăn rơkâ, mê dâng hâi lơ 25 a hiăng ăm ƀă tài khoản’’.

Ôh tá xê tơmối dêi mơngế xêh, mâu khu pêi cheăng tơrŭm, khu mơdró kâ, khu ngăn pêi chiâk xuân châ xúa ki pơxúa ki mâu tơdroăng cheăng ƀă kơxô̆. Tơdroăng tơdjêp pơla hngêi rak liăn ƀă kơ koan pro hnoăng mơhá, khu ngăn tíu mơdró tơkăng kong, hnôu rak liăn kum khu mơdró pêi tơdroăng cheăng tơná ‘na riân rak ngăn liăn rĕng, tơdrăng hlối kơdĭng kơxô̆ liăn nâp phí. Nâ Triệu Thị Hạnh, Khu pêi cheăng tơrŭm ngăn chiâk deăng ƀă mơdró kâ Bình Minh, cheăm Čư̆ Mgar tối:

“Pakĭng ngế riên ngăn liăn ngin hlo app kô tơ’lêi hlâu, ngin ôh tá êa thế lăm troh a hngêi rak liăn đi đo vâ nâp liăn mê ối pêi pro tâi tâng tŭm tơdroăng a app, ối ‘nâi a kŏng ti xuân hiăng chiâng pêi pro”.

‘Nâi nhên pơhlêh kơxô̆ cho hnoăng cheăng ki kal vâ mơdêk ivá tơbriêt cheăng, mâu hngêi rak liăn tung kong pơlê Dak Lak dế mơdêk troăng hơlâ hnê kuăn pơlê, khu mơdró xúa tơdroăng pêi pro ƀă kơxô̆, hlối tối hdrối tơdroăng chêh ‘măn tung kơmăi dêi tơmối rơtế ƀă tíu xiâm kơmăi chêh ‘măn mâu tơdroăng dêi tơnêi têa ‘na pơ’leăng mâ kuăn pơlê. Pôa Huỳnh Cô Sự, Phŏ pơkuâ hngêi rak liăn Agribank ai tíu pêi cheăng a Čư̆ Mgar, ăm ‘nâi:

“Agribank ai tíu pêi cheăng a Čư̆ Mgar hnê tối ăm kuăn pơlê pêi pro tơdroăng ăm mung liăn ƀă xo tơvêh liăn chĕn băng ứng dụng E-banking, kum ăm mơngế ki mung liăn kơdĭng kơxô̆ liăn nâp phĭ, hâi chôu, kơmăi hiăng hbrâ xêh tung tơdroăng xo liăn chĕn ki mung. Ƀă hngêi rak liăn mê kơdĭng mâu kơxô̆ liăn nâp phĭ ‘na pro hlá mơ-éa, liăn prôk lăm mơnhên ngăn ƀă mâu kơxô̆ liăn nâp phĭ ki ê, mơdêk ki tơƀrê dêi tơdroăng cheăng, kum ăm hngêi rak liăn xo tro hâi khế ƀă xo tŭm, teăm tơdrêng”.

Tơdrêng ƀă xúa kŏng ngê̆ tung pêi cheăng, mâu hngêi rak liăn ối tơmâng hnê thế rơkê ‘na pêi cheăng ƀă kơxô̆ ăm mâu kăn ƀô̆, tơrŭm ƀă mâu kơ koan khu râ pơkuâ cheăng vâ mơjiâng tơrŭm cheăng kơxô̆ tơdrêng tơdâng tâi tâng tung lâp kong pơlê. Jâ Vũ Mai Sa, Phŏ pơkuâ hngêi rak liăn Agribank ai tíu pêi cheăng Peăng kơnhŏng Dak Lak ăm ‘nâi:

“Ngin kơhnâ tơbleăng mâu tơmeăm, mơdró, nâp liăn ing ứng dụng kŏng ngê̆ tiô túa nếo nôkố, hbrâ mơdêk kơmăi CDM/ATM troh a mâu thôn pơlê, kơpong hơngế hơngo. Pro ăm lĕm mâu tơdroăng chêh ‘măn tung kơmăi ‘na kuăn pơlê, tăng ‘nâi plĕng sinh trắc học ăm tơtro ƀă tơdroăng chêh ‘măn tung kơmăi dêi tơnêi têa ‘na kuăn pơlê. Pơhlêh kơxô̆ tiô túa, ƀăng pro hlá mơ-éa a tíu hmâ pro hlá mơ-éa nah nôkố hiăng pêi cheăng ƀă điê̆n tưh hlối xúa mâu tơmeăm, tơdroăng pêi pro pơtroh liăn a mâu ƀâng kơxô̆, kuăn pơlê ôh ti êa lăm troh mơdoh chôu pro hlá mơ-éa, mê ối pêi pro rĕng’’.

Pơhlêh kơxô̆ dế chiâng tơdroăng ki kal vâ mâu hngêi rak liăn a Dak Lak po rơdâ tơdroăng pro hlá mơ-éa nâp liăn ƀă điê̆n tưh, kum kuăn pơlê a kơpong tung thôn châ mung liăn, ăm liăn rĕng ƀă rak ngăn liăn ngân tơ’lêi hlâu tâ. Ôh ti xê to “troh a kŏng’’ kuăn pơlê, hngêi rak liăn ối rơtế ƀă kuăn pơlê mơ-eăm mơnhông pêi cheăng kâ tiô túa nếo nôkố, veăng pơhlêh pơkâ pơ’lêh kơxô̆ dêi tơnêi têa, mơnhông cheăng kâ kơxô̆ troh a mâu pơlê.