A rôh hôp, mâu ngế cheăng hiăng môi tuăn ƀă mâu tơdroăng kal ki hiăng mơ’no, tơdrêng amê hlối têk kŏng tơbleăng tơdroăng Pơkâ ‘mâi rơnêu xoăng hnoăng cheăng ƀă mâu ngế cheăng tung Hô̆i đong tâ phĭu tơnêi têa ƀă Tíu ki gum pêi cheăng Hô̆i đong tâ phĭu tơnêi têa. Tơpui mơgêi rôh hôp, Kăn xiâm hnê ngăn Kuô̆k hô̆i pơkâ thế pôi ăm ai mâu tơdroăng ki ôh tá tro tung chêh pro mơéa tơdjâk troh hnoăng tâ phĭu, chêh inâi vâ pro kăn; tơkŭm po rơkê tơniăn; “pêi sap ing hdrối, sap ing hngế”, nhên ngế, nhên cheăng, nhên hâi khế, nhên tơdroăng ki tơƀrê, nhên hnoăng cheăng; thăm mơnhông lăm ngăn, séa ngăn krê tơniăn; xo kuăn pơlê pro ngế ki xiâm.

Hô̆i đong tâ phĭu tơnêi têa tơrŭm lĕm tro, tơdrăng rơkê pơla Tơnêi têa ƀă kong pơlê; mơdêk hnoăng cheăng pôu râng dêi ngế ki ối a ko; tŏng gum teăm tơdrêng mâu tơdroăng ki pá; tơdroăng ki trâm, malối cho kong pơlê, cheăm bêng. Malối tung pơla dế pêi pro túa pêi cheăng kăn pơkuâ péa râ, hên cheăm ối nếo, xua mê, mâu khu xiâm kơvâ cheăng ki ai tơdjâk troh kal tơmâng ngăn, hnê mơhno kơtăng. Thăm mơnhông tơdroăng cheăng hnê tối tung um tơvi, kong ngê̆, gâk kring, hnoăng kuăn pơlê, malối cho kuăn pơlê a kơpong hngế hngo, kăng kong, chuăn rơlốu, kŏng nhân a tíu pêi cheăng, droh rơtăm, sinh viên ƀă hên ki ê.

Mâu kơ kpan séa ngăn mâu tơdroăng cheăng hbrâ rơnáu krâu Rôh hôp lâp tơnêi têa tơbleăng tơdroăng cheăng tâ phĭu a hâi lơ 15/11; tơkŭm mâu kơxô̆ liê̆u tíu pêi cheăng tâ phĭu, inâi mâu tíu tâ phĭu pôk ƀă kơxô̆ ngế kăn Kuô̆k hô̆i châ pôk a rêm to tíu pêi cheăng vâ pơtroh ăm Hô̆i đong Tâ phĭu tơnêi têa pơkâ ƀă tơbleăng, hdrối hâi lơ 25/12/2025.