Kơxo lơ 22/2, Khu pơkuâ cheăng Đảng Pơlê kong kân Hồ Chí Minh hiăng tơkŭm po Hneăng hôp mơgêi pơtân 5 hơnăm pêi pro Pơkâ kơxô̆ 20 dêi Khu pơkuâ hnê ngăn cheăng Đảng Tơnêi têa ‘’ ‘na pơtối thăm pêi pro, mơdêk ki dâi lĕm, hriăn plĕng, rah xo, pơtâng tối, hnê hriâm tơdroăng mơnhông mơdêk Đảng’’. Pơlê kong kân ai 22/22 pơlê kân, tơring, pơlê kong kân Thủ Đức ƀă 281/312 bêng, cheăm, pơlê kong krâm rah chêh ƀă in tơmeăm tơdroăng mơnhông mơdêk Đảng ƀô̆ tơdroăng mơnhông tơplâ xâ kăch măng hneăng hơnăm 1930 – 1975 ƀă sap hơnăm 1975 troh nôkố.

Mơhé ti mê, tung tơdroăng pêi pro Pơkâ kơxô̆ 20 dêi Khu pơkuâ hnê ngăn cheăng Đảng tơnêi têa a Pơlê kong kân Hồ Chí Minh xuân ối hên tơdroăng ki hâi tơtro môi tiah: Tơdroăng rah xo mơngế pêi cheăng, môi iâ xua tơdroăng pơtâng tối tơdroăng kal tơnêi têa ôh tá ai ƀiên chê̆ ăm kơvâ Lĭch sưh Đảng. Xông tơpui a hneăng hôp, pôa Nguyễn Hồ Hải, Kăn phŏ pơkuâ hnê ngăn cheăng Đảng pơlê kong kân pơkâ thế: Tung la ngiâ, mâu tíu cheăng kal pơtối pêi pro ƀă rak tơniăn mâu tơdroăng ối tơvâ tơvân tung tơdroăng nôkố.

Pro ti lâi vâ tơdroăng rah chêh pơtâng tối, hnê hriâm tơdroăng mơnhông mơdêk Đảng rế hía rế lĕm tro tâ, tơtro ƀă rêm ngế, ki má lối cho rơxông ối nếo. Ai mâu tơdroăng xiâm hnê mơhno vâ kuăn pơlê hlê plĕng tro tơdroăng dêi tơdroăng mơnhông mơdêk ƀă tơdroăng ki mơ-eăm pêi pro tơdroăng cheăng kố.