Koh tơbâ 93 hơnăm hâi mơjiâng Đảng ƀă tơmiât troh tơbâ 15 hơnăm hâi mơjiâng pơlê kong krâm Ƀuôn Hồ, kơxo lơ 1/2, Vi ƀan hnê ngăn pơlê kong krâm Ƀuôn Hồ, kong pơlê Dak Lak tơkŭm po leh pơxiâm bro mâu kế tơmeăm ki kal dêi pơlê kong krâm, mơ-eăm pêi châ tơƀrê mâu tơdroăng pơkâ kơphô̆ túa má III. Vi ƀan hnê ngăn pơlê kong krâm Ƀuôn Hồ, kong pơlê Dak Lak tơkŭm po pơxiâm bro 4 to kế tơmeăm ki kal, tơkŭm tung mâu kơvâ cheăng troăng prôk ƀă tâi tâng kơlo liăn ‘no dâng 37 rơtal liăn, tiô tối hdrối kô klêi a hneăng má 2 ƀă hneăng má 3 hơnăm kố.

Mâu kế tơmeăm kố ối tung tơdroăng ki hơ’lêh bro hngêi trăng, troăng klông, pêi pro châ tiô tơdroăng ki rơhêng vâ prôk lăm dêi kuăn pơlê. Pôa Đặng Gia Duẩn, Kăn hnê ngăn Vi ƀan pơlê kong krâm Ƀuôn Hồ ăm ‘nâi, ƀă tơdroăng ki tơkŭm po pơxiâm bro mâu kế tơmeăm sap ing apoăng hơnăm, pơlê kong krâm khŏm xúa tơƀrê mâu kơxô̆ liăn ‘no cheăng dêi tơnêi têa. Tơdrêng amê, hlối mơdêk tơ’mot kơxô̆ liăn ‘no pêi cheăng, mơ-eăm mơjiâng pơlê kong krâm Ƀuôn Hồ chiâng tíu xiâm cheăng kâ, mơhno túa lĕm tro, pơlê pơla dêi kơpong kŭn peăng kơnhŏng kong pơlê Dak Lak, cho hnoăng cheăng ki kal tung mơdêk dêi kơpong ki kŭn.