Roh lăm pôu pêi cheăng ki kơnâ kố, cho tơdroăng tơpui tơno khu râ kăn xiâm apoăng pơla péa tơnêi têa sap ing mơjiâng tơrŭm tơpui kâ pơla péa pâ châ 45 hơnăm hdrối (1980 – 2025). Kơxê lơ 12/11, klêi kơ’nâi leh tơdah păng ‘nâng, pôa Lương Cường, Kăn xiâm hnê ngăn tơnêi têa hiăng tơpui tơno ƀă pơtáu kong têa Jordan. Tung tơdroăng po phiu ro, tá hâi hiâm mơno, loi tơngah ƀă hlê plĕng dêi pó, péa kăn xiâm pơkuâ môi tuăn rơtế djâ tơrŭm tơpui kâ pơla péa pâ mot tung môi hneăng nếo.

Péa pâ kal pro krá tơniăn loi tơngah kal kí ing mâu tơdroăng tơpui tơno râ kăn, ki rơhêng vâ tối cho mâu khu râ kăn xiâm. Tơdrêng amê mơdêk tơrŭm tung mâu kơvâ ki kal ki ê, tung mê, ai gâk kring tơnêi têa, gâk kring tơniăn, tối ăm dêi pó tơdroăng, tơpui tơno pơla ngế ki rơkê... Tung kơvâ cheăng kâ, péa kăn xiâm pơkuâ môi tuăn pro tơ’lêi hlâu ăm tơdroăng lôu péa kơchơ mơdró ăm mâu tơmeăm ki kơnâ dêi pó, tơdrêng amê mơhnhôk khu tê mơdró péa tơnêi têa hriăn plĕng ai ivá tơrŭm cheăng, mơ’no liăn cheăng, ki rơhêng vâ tối tung mâu kơvâ mơjiâng hngêi trăng, troăng klông, cheăng kâ krúa lĕm, cheăng kâ xúa kŏng ngê̆, hyôh phôn, pêt mơjiâng tơmeăm, uâ bro kế tơmeăm khoăng pêi lo ing chiâk deăng...

Pơtáu kong têa Jordan pơkâ thế péa tơnêi têa hriăn plĕng rĕng po troăng kơneăng tơdrăng tơdrêng. Péa kăn xiâm pơkuâ tơnêi têa xuân tơpui tơno mâu troăng vâ mơdêk tơrŭm khăm pơlât, cho tơdroăng ki rơdêi dêi Jordan, ki rơhêng vâ tối tung mâu kơvâ khăm pơlât ing hơngế, xúa kŏng ngê̆ tung khoa hok hriăn plĕng khăm pơlât ivá châ chăn.