Ai hên tíu ki môi tiah dêi rơpó tung péa rôh tơklâm rơxế a kơxêi măng lơ 12 ƀă kơmăng hâi lơ 14/2 pơla hdrối kố nah a drô troăng  Hồ Chí  Minh, pơla troăng  tơkâ tơring Đăk Glei ƀă troăng kân 40B, pơla troăng tơkâ luâ tơring Đăk Tô, kong pơlê Kon Tum, mê cho: Tŭm péa rôh tơklâm rơxế  kân to kơduôp pro 3 ngế hlâ, 4 ngế tro rong; Tŭm ngế ki vê rơxế trâm xía vâ mê  môi ngế ối a kong pơlê Thanh Hóa ƀă môi ngế ối a kong pơlê Long An.

Tơdrêng ƀă tơdroăng tơviah troăng prôk, tiô thươ̆ng tăng Nguyễn Hướng, Kăn phŏ  Ƀơrô Kăn Sát gak ngăn troăng prôk, Kŏng an kong pơlê Kon Tum, ngế ai hên hơnăm séa ngăn, tơleăng mơnhên mâu tơdroăng trâm xía vâ ‘na troăng prôk ó a kong pơlê Kon Tum tối khu ki ai mê xôi xua ôh tá hbrâ rơnáu mê cho ki xiâm pro chiâng ai tơdroăng tơklâm rơxế.

“ Ngin hlo ki hên cho tơdroăng xôi tơngôu ôh tá hbrâ rơnáu hdrối dêi mơngế ki vế rơxế. Má môi ôh tá teăm vâ kâ prê. Má péa xua rĕng thâ. Ai pơla mâu troăng ki ‘nâ drêng vế rơxế pơtối dêi rơpó pá rŏng a pơla mâu troăng kơtâu hơngế, ai mâu ngế ki vế rơxế ki ‘nâ ôh tá vâ mơ-eăm tơkôm ‘nôm, rĕng thâ kơtâu vâ rĕng tơluâ rơxế ki hdrối kơdrâ trâm  a mâu tíu víu vâ  ví pá kô lơ pá tá, mâu troăng ki mê kŭn pá ngiâ ai mâu rơxế ki prôk ing tá há ah chiâng tơklâm dêi rơpó’’.

Xuân tiô Thượng tá Nguyễn Xuân Hướng a mâu troăng kân tơkâ luâ kong pơlê Kon Tum ai hên troăng ai văng rơ-iô, mâu ki vế rơxế  đi đo hbrâ rơnáu, mê cho: Văng Lò Xo a troăng kân Hồ Chí Minh; Văng Rơi, a troăng kân 40B; văng  Măng Deăng, văng Vi ô lắc a troăng kân 24; văng Ngọc Vin a troăng kân 14C… bă hên văng ki ê.

Thượng tá Nguyễn Xuân Hướng ăm ‘nâi, hlo ai rế hên rôh tơklâm rơxế a troăng kân ki tơkâ luâ kong pơlê tung mâu hâi achê pơla kố, mâu lêng kăn sát  gak troăng prôk hiăng mơdêk hnoăng cheăng hnê mơhno ƀă tối tơbleăng ăm kơ mâu ki vê rơxế.

“ Mâu ki vế rơxế kân ki chơ tơmối malối cho mâu ngế vê rơxế kân kdrối vâ to a văng thế pơtê ‘nôi, ngăn dêi mâu rơxế mâu prê, ki vê, pro ăm dêi kơtôu chêng rơxế rơngiâp ‘nôi. Drêng troh a văng khŏm thế tơtrŏng ngăn mâu tíu chêh tơbleăng hnê, tơbleăng tối ‘na troăng prôk.  Ngế vê rơxế thế tơvêh kơxô̆ ki iâ vâ pro ăm kơmăi gá tô ví kơtôu chêng rơxế kơtâu puk pâk ah chiâng tơdjâk troh prê vâ kâ kô pro chếo prê, tiê ôh tá kâ ti mê chiâng rơ-iô’’.

Pôa Khuất  Việt Hùng,, Kăn phŏ hnê ngăn tơdroăng pơkuâ Vi ƀan ngăn ‘na rak  tơniăn Troăng prôk Tơnêi têa ăm ‘nâi, a kong pơlê Kon Tum tối krê ƀă kơpong Tây Nguyên tối tơdjuôm tơdroăng pro xôi luât pơkâ ‘na pro ôh tá tơniăn troăng prôk, môi tiah rơxế ô tô chơ hngăm luâ râ, mâu kuăn pơlê to rơxế mô tô, rơxế hon đa ôh tá xâu muâk rak ko, ‘nâ hiăng ai têa drôu tung châ xuân ối vê rơxế…

A mâu troăng kân tung kơpong xuân ối hên tơdroăng rơ-iô trâm xía vâ tơklâm rơxế a troăng prôk a tơnêi têa ƀă a mâu tơkăng, kơvâ cheăng dêi kong pơlê kal pơtối mơdêk tơdoăng hnê tối vâ pơ’lêh ki hlê plĕng ƀă tơdroăng pêi pro dêi kuăn pơlê tung tơdroăng prôk drô troăng kân:

‘’Tơdroăng pin tơkŭm hnê tối mâu tơdroăng thế rak tơniăn drô troăng prôk, môi tiah: hiăng ôu drôu ƀiêr pôi tá vế rơxế , ôh tá chơ tơmeăm hngăm luâ pơkâ, ôh tá kơtâu têi pro dêi kơtâu pa kố pa tá, kơtâu luâ hmâng vâ, truâ muâk rak ko ki ôh tá krá drêng kơto rơxế motô, rơxế hon đa. Mâu tơdroăng hnê tối mê tơ’lêi hlâu chôu vế, tơ’lêi tâng vâ rak vế. Klêi hnê tối mê mâu vâi rơtăm, hên kuăn pơlê ‘nâi plĕng luât pơkâ, ‘nâi mâu tơdroăng hnê rak tơniăn drô troăng prôk. Ing mê, choâ kum ăm kuăn pơlê hlê plĕng luât ‘na rak tơniăn drô troăng prôk kum ăm tơdroăng prôk drô troăng kong kong pơlê rế tơniăn.