Ƀă kuăn pơlê Đăk Ga, cheăm tíu tơkăng kong Đăk Nhoong, tơring Đăk Glei, kong pơlê Kon Tum, rêm hdroh chi ƀô̆ ’mot đảng viên nếo cho tơdroăng leh kân tơdjuôm dêi lâp pơlê. Nôkố chi ƀô̆ pơlê Đăk Ga ai 25 ngế đảng viên ƀă tâi tâng to mâu ngế Jêh - Triêng.

Ngoh A Cu, Chi ủy viên, kăn thôn ăm ‘nâi:

“Châ mot Đảng hâk tơngăm ‘nâng. Drêng châ mot Đảng á pơ’lêh hên. A châ hriâm hên tơdroăng ki tro ki ‘ló, ai pơxúa ing mê hnê ăm kuăn pơlê. Đảng viên, pin thế pro troăng lĕm a hdrối, pro troăng ăm kuăn pơlê hlo, hnê kuăn pơlê mơnhông cheăng kâ. Malối nôkố pơ’lêh tơdroăng tơchĕng tơmiât, túa pêi cheăng, pin thế hriĕn plĕng ki nếo, ki tro. Túa tơlá  ton nah ôh pa tro thế  tah lôi, tơdroăng hmâ pêi pro ki lĕm ton nah  pin thế râk.

Á cho môi ngế kăn thôn mê a mơhnhôk kuăn pơlê pêi cheăng kâ mơnhông dêi rơpŏng hngêi cheăng kâ châ tơ brê ai hmê kâ phâi, rêh ối hơniâp ro’’.

Cheăm tơkăng kong Đăk Nhoong châ Khu kăn Đảng tơring Đăk Glei khĕn kơdeăn cho môi tung mâu cheăm ki pêi tro tơdroăng mơdêk Đảng kơpong hdroâng kuăn ngo. Nôkố Đảng ƀô̆ cheăm ai 184 ngế đảng viên, tâi tâng cho đảng viên kuăn ngo.

Pôa A Nang, Kăn phŏ hnê ngăn Đảng ủy cheăm Đăk Nhoong ăm ‘nâi, môi tung mâu tơdroăng cheăng pêi dêi đảng ƀô̆ cho tung pơla séa ngăn hồ sơ thế ngăn nhên ƀă thế  tro:

“Drêng Chi ƀô̆ séa ngăn pơtroh ăm ngin rĕng rế tro.  Ngin hôp Khu râ kăn rêm khế môi ngế, péa ngế, ngin xuân chêh pơtroh ăm râ kơpêng. Mâu ngế kơ’nâi hlo pêi rĕng, séa ngăn rĕng hlối tro nhên, kơ’nâi mê hía nếo vâi mơ-eăm vâ  hên ngế châ mot Đảng. Tâng pin pro hồ sô kố, u tá, lôi ton môi măng tĭng, péa măng tĭng, a tá môi măng tĭng, péa măng tĭng, ‘nâ kô ton châ plâ hơnăm xuân hâi kâi klêi séa ngăn”.

Đăk Glei cho môi tung 3 tơring ai tơdroăng cheăng kâ rêh xơpá má môi dêi kong pơlê Kon Tum, lâp tơring ai vâ chê 90% pơ’leăng mâ mơngế kuăn ngo. Pôa A Phương, Kăn hnê ngăn Đảng tơring Đăk Glei ăm ‘nâi. Khu kăn Đảng tơring tơmâng khât tơdroăng ‘mâi mơnhông cheăng Đảng a cheăm tơring ƀă mơdêk tơ’mot hên ngế mot đảng viên a mâu thôn pơlê.

“Ngin xoăng hnoăng cheăng ăm mâu Kăn hnê ngăn Đảng tơring, klêi mê râ ủy pơkuâ ngăn a mâu cheăm vâ tí tăng ‘nâi mâu tơdroăng klêi mê hnê, séa ngăn kuăn pơlê ki lâi ai hiâm mơno lĕm, rơkê kơhnâ cho mâu kuăn ngo. Kơxô̆ đảng viên cho mâu ngế ối a ko, cho mâu ngế ki djâ troăng lĕm a hdrối ăm kuăn pơlê.

Tơdroăng kơdo mơ-eăm a Đảng, malối cho kơpong cheăng kăch măng vâi vâ mot Đảng vâ pêi cheăng pro pơxúa ăm kuăn pơlê, ăm dêi pơlê pơla tơnêi têa tơná xua nôu pâ vâi nah xuân cho mâu ngế veăng tung kăch măng’’.

A kơpong Tây Bắc, kơnôm tơ’mot hên đảng viên a kơpong hdroâng kuăn ngo, malối tung 5 hdroâng kuăn ngo kơtiê xơpá má môi cho Cống, Mảng, La Hủ, Si La, Lự, kong pơlê Lai Châu hiăng chôa lâng ‘mâi mơnhông, mơdêk ki tơƀrê dêi khu tơrŭm cheăng Đảng ƀă đảng viên a cheăm pơlê.

Đảng viên Phùng Giò Xó, ối a pơlê Phìn Khò, cheăm Bum Tở xuân cho môi tung mâu ngế ki djâ troăng lĕm a hdrối a tơring Mường Tè, kong pơlê Lai Châu. ƀă troăng rơhlâ đảng viên thế pêi ahdrối vâ kuăn pơlê hriâm ƀối, nâ Xó hiăng pêt lối 1 ha loăng hâng ƀă klô̆ng, tơrŭm ƀă păn mơnăn. Ing môi rơpŏng xơpá nah, rơpŏng hngêi đảng viên kuăn ngo La Hủ kô hiăng mơ-eăm pêi cheăng mơnhông dêi tơná chiâng rơpŏng kro mơdrŏng.

Ai liăn, tơmeăm khoăng, nâ Xó hnê ăm vâi túa cheăng kâ ƀă hlối kum hên rơpŏng tung pơlê châ hluăn kơtiê. Nâ Xó châ kuăn pơlê pâ nhoăm pôk nâ pro kăn pơlê  drêng nếo 23 hơnăm:

“Á cho đảng viên hlối cho kăn pơlê mê a thế djâ troăng ahdrối tung tŭm tơdroăng, klêi mê hnê ăm kuăn pơlê rơtế pêi. Nôkố kuăn pơlê xuân pêt loăng hâng. Tâng pơchông ƀă hdrối nah, nôkố kuăn pơlê hiăng hlâ plĕng tâ, hlo pêi cheăng tơƀrê loi kơ pin tâ’’.

Bum Tở cho cheăm ai 100% cho kuăn ngo La Hủ. Hên hơnăm hdrối, kuăn pơlê hmếo pơ ối kơklêa kơtiê. Ƀă tơdroăng mơ-eăm pơ’lêh hdrê loăng plâi, kum kuăn pơlê tăng troăng mơnhông cheăng kâ nếo, tơniăn tung rêh ối, Đảng ủy, mâu kăn cheăm hiăng khên pơ’lêh tuăn tơchĕng tơmiât, tăng mâu hơnăm ối nếo ki ai tuăn lĕm, kơhnâ pêi cheăng vâ kum kuăn pơlê. Ƀă tơdroăng pêi pro mê,  Bum Tở hiăng hlo pơ’lêh hên ing mâu hơnăm ối nếo,  ƀă 100% ngăn kăn hnê ngăn, kăn thôn cho mâu  ki kot mâ sap hơnăm 1985- 1999. 

Mâu ngế hơnăm ối nếo mê hiăng hnê tối, mơhnhôk, hnê kuăn pơlê pêt loăng hâng, păn í pêap, chu, ro, kơpôu ƀă hnê kuăn pơlê tah lôi khôi túa, tơlá ton nah ki ôh pá tro.

Pôa Đỗ Văn Khải, Kăn hnê ngăn Đảng ủy cheăm Bum Tở, tơring Mường Tè ăm ‘nâi:

 “Malối klêi kơ’nâi hneăng hôp kân hneăng hơnăm 2020-2025, rế hên mâu kăn ƀô̆ hơnăm ối nếo, malối kăn ƀô̆ thôn pơlê 100% ngế cho kuăn ngo  a pơlê mê hiăng hơ pơ’lêh nhên tâng vâ pơchông ƀă  mâu hơnăm hdrối’’.

Mơhé ối a tơring hngế hngo dêi Đăk Glei, kong pơlê Kon Tum lơ a mâu pơlê, cheăm kơtiê xơpá dêi kong pơlê Lai Châu, mâu đảng viên kuăn ngo dế rêm hâi mơ-eăm kum kuăn pơlê kơdroh kơklêa xăm kơtiê, mơnhông khu cheăng Đảng rơdêi. Vâi đi đo cho plá on koh ki pơtối, hnê mơhnhôk kuăn pơlê mơ-eăm pêi cheăng kâ  vâ ai tơdroăng rêh ối phâi tơtô, hơniâp ro.