Kơxo lơ 13/2, a Hngêi Kuô̆k hô̆i, pơxiâm po hneăng hôp roh má 20 dêi Vi ƀan pơkuâ cheăng Kuô̆k hô̆i. A rôh hôp mê, Vi ƀan pơkuâ cheăng Kuô̆k hô̆i ăm hnê tối ‘na môi tơdroăng ki kân ối tơpui pơrá phá dêi mâu tơdroăng tơkêa luât, mê cho Luât Hbrâ rơnáu; Luât Kring vế hnoăng ki pơxúa dêi mơngế rôe xúa (‘mâi hơ’lêh); Luât tê mơdró ƀă điê̆n tưh (‘mâi hơ’lêh); Tơdroăng chêh hlá mơ-éa luât Pơkâ kring tơniăn ‘na tơdroăng chêh dêi mơngế; hlá mơ-éa Pơkâ ‘na hnoăng cheăng, hnoăng chiâng pêi pro ƀă tơdroăng mơjiâng, tơkŭm dêi Khu chêh tôm xo rơkong; hlá mơ-éa Pơkâ dêi Vi ƀan pơkuâ cheăng Kuô̆k hô̆i ‘na tơdroăng tơ’noăng, khĕn kơdeăn ƀă mâu kăn Kuô̆k hô̆i, mâu kơ koan dêi Kuô̆k hô̆i, mâu kơ koan dêi Vi ƀan pơkuâ cheăng ƀă kăn ƀô̆, kŏng chưk dêi râ kăn rak ngăn dêi Vi ƀan pơkuâ cheăng Kuô̆k hô̆i.

Vi ƀan pơkuâ cheăng Kuô̆k hô̆i xuân séa ngăn, tơbleăng hlá mơ-éa Luât pơxâu phak xôi luât cheăng tung tơdroăng riân ngăn liăn ngân tơnêi têa; hlá mơ-éa luât pơkâ hnê pêi pro tơdroăng pơkâ dêi rôh hôp Kuô̆k hô̆i.