Kơmăng lơ 18/12, a plông kân Lâm Viên pakĭng long Xuân Hương ki lĕm mơnâ, Festival reăng Đà Lạt rôh má 9 hơnăm 2022 hiăng pơxiâm po.  Ƀă pơxá “Đà Lạt - pơlê kong kơdrâm pŭn rơnó reăng” Festival reăng Đà Lạt rôh má 9 hơnăm 2022 cho tơdroăng pơtối, mơhno, ô eăng mơngế pêt reăng ƀă tơbleăng mâu tơdroăng ki kơnía ‘na reăng, ‘na mâu tơmeăm pêi lo ing chiak deăng ki vâi ô eăng cho tơmeăm ki ki xiâm dêi Đà Lạt - Lâm Đồng môi tiah: kơchâi, chế, kơphế, ché lụa. 

Tơbleăng a hâi leh pơxiâm po, jâ Võ Thị Ánh Xuân, Kăn xiâm phŏ hnê ngăn tơnêi têa tối tiah kố, Festival reăng Đà Lạt rôh má 9 cho po mơdĭng ki ro, ai tơdjâk pơxúa, ô eăng ki lĕm krê xêh dêi Đà Lạt, hlối mơdêk kơvâ pêi cheăng, tê mơdró ƀă tê ăm kong têa ê reăng hiăng châ mơnhên inâi Đà Lạt - tơdroăng cheăng kâ ki lĕm - tơnêi lĕm’’.

Kăn xiâm phŏ hnê ngăn tơnêi têa têa tối, kố xuân cho rôh ki tro vâ tơbleăng um méa kơpong tơnêi Đà Lạt lĕm krip, kuăn mơngế Đà Lạt ‘’ têm rơpiât, pâ hlế  kơ tơmối’’, veăng mơnhông mơdêk kơpong ôm hyô, ‘mâi mơnhông, mơdêk cheăng kâ - rêh ối klêi kơ’nâi ai pơreăng kân COVID-19.