Hâi lơ 7/12, a pơlê kong kơdrâm Quy Nhơn, kong pơlê Bình Định, pơxiâm po hneăng hôp pơtroh kơthô dêi mâu kong têa ASEAN (ASEANPOST) rôh má 28. Hneăng hôp xua Khu xiâm ngăn ‘na mơdró kâ pơtroh kơthô Việt Nam (Vietnam Post) chêh inâi tơkŭm po. Hneăng hôp tơpui ‘na pơtroh kơthô  ASEAN po sap hâi lơ 7 troh lơ 9/12/2022 ƀă veăng ai kăn teăng mâ ngăn ‘na Tơdroăng pơtroh kơthô dêi mâu 10 to kong têa Đông Nam Á, tơkŭm tơpui ‘na tơdroăng tơbleăng mâu tơdroăng ‘na tơrŭm cheăng hên troăng, pơkâ pêi pro  châ tơbleăng a Hneăng hôp Khu tơrŭm pơtroh kơthô Lâp plâi tơnêi ƀă Khu tơrŭm cheăng kơpong châu Á - Thái Bình Dương.

Malối, mâu kăn xiâm dêi khu pơtroh kơthô 10 to kong têa Đông Nam Á kô mơdoh hên chôu tơpui tơno, ‘na troăng rơhlâ pơtroh kơthô, kế tơmeăm tung lâp plâi tơnêi; mâu rôh ƀă tơdroăng pơloăng mơnúa dêi tơdroăng pơtroh tơmeăm tung la ngiâ; troăng rơhlâ mơdêk tơƀrê mâu tơmeăm pêi  lo mơdró chơ chiên tiô tơdroăng hmâ pêi sap nah, mơdró chơ chiân rĕng EMS, pơtroh  tơmeăm điê̆n tưh; tem mơdró; mâu tơmeăm mơdró ki rế tâk yă liăn...