Kơmăng lơ 10/3, a plông kân 10/3, pơlê kong kơdrâm Ƀuôn Ma Thuột, kong pơlê Dak Lak hiăng pơxiâm po Leh tơbleăng kơphế Ƀuôn Ma Thuột roh má 8, hơnăm 2023. Pôa Trần Lưu Quang, Ngế pro xiâm phŏ hnê ngăn Chin phuh, khu kăn xiâm mâu râ, kơvâ cheăng dêi kong pơlê Dak Lak ing rêm rơxông, teăng mâ mâu khu pêi cheăng kâ, uâ mơdiê, mơ’no têa kơphế tung tơnêi têa ƀă kong têa ê rơtế ƀă mâu hdroâng kuăn ngo tung kong pơlê, kong pơlê ê veăng ai mâ châ ngăn, châ hlo.

Ƀă inâi, dó “Ƀuôn Ma Thuột-tiú ki troh dêi kơphế lâp plâi tơnêi”, Leh tơbleăng kơphế Ƀuôn Ma Thuột roh má 8 pơtối vêh mơnhên ki dâi khât ƀă mơdêk ki kơnía dêi kơphế Việt Nam troh a mâu kong têa ê tung lâp plâi tơnêi.

Xông tơpui a roh leh mê, pôa Trần Lưu Quang tối nhên, Khu kăn pơkuâ hnê ngăn kong pơlê athế pơtối mơdêk hnoăng cheăng tơbleăng tối, marketing, mơhno mơnhên inâi ki tơtro ƀă ivá dêi tơná. Thăm mơnhông pêi mơjiâng kơphế ki dâi lĕm, kơphế ki xú hŏm lĕm dêi Việt Nam, tơtro tiô túa pơkâ dêi lâp plâi tơnêi, tơtro, tơxâng ƀă tơdroăng pói rơhêng vâ dêi mơngế ki ôu rế hiá rế dâi lĕm.