Kơxo lơ 15/3, a Hngêi Kuô̆k hô̆i, pơxiâm po roh hôp má 21 dêi Vi ƀan pơkuâ Kuô̆k hô̆i. Tơtrŏng má môi a roh hôp kố, Vi ƀan pơkuâ Kuô̆k hô̆i tơkŭm po kơ-êng ƀă tiâ rơkong kơ-êng mâu tơdroăng xiâm tung kơvâ Hngêi tơleăng ƀă séa ngăn tơdroăng vâ mơdât mâu tơdroăng xôi luât. Pôa Nguyễn Hòa Bình, Ngế ối a ko hngêi tơleăng kuăn pơlê râ xiâm ƀă pôa Lê Minh Trí, Kăn pơkuâ Kơ koan xiâm hnê kuăn pơlê arak luât râ xiâm tiâ rơkong kơ-êng a roh hôp.

A mâu roh kơ-êng, mâu Ngế xiâm: Kŏng an, mơjiâng luât; Kăn xiâm séa ngăn Chin phuh rơtế veăng tiâ rơkong kơ-êng, tối ‘na mâu tơdroăng ai tơdjâk. Xuân a roh hôp kố, Vi ƀan pơkuâ Kuô̆k hô̆i tơpui mâu tơdroăng kân tơpui phá tơ-ê dêi pó dêi tơdroăng tơkêa bro Luât yă (‘mâi rơnêu); tơdroăng tơkêa bro luât pơkâ yă mơjiâng tơmeăm (‘mâi rơnêu); tơpui tối ‘na tơdroăng tơkêa bro Luât têa (‘mâi rơnêu); tơdroăng tơkêa bro Luât pơkuâ, gâk kring tơmeăm cheăng lêng ƀă kơpong cheăng lêng; tơdroăng tơkêa bro Luât tơrŭm cheăng (‘mâi rơnêu); tơdroăng tơkêa bro Luât hngêi ối (‘mâi rơnêu).