Kơxo lơ 17/3, a Hà Nội, pơxiâm po rôh Leh tơbleăng hlá tơbeăng lâp tơnêi têa 2023. Mơdĭng tơbleăng hlá tơbeăng po tung 3 hâi sap ing hâi lơ 17/3 troh lơ 19/3 ai inâi “Tơrŭm – Rơkê – Mơhno túa lĕm tro – Tơchĕng tơmiât rơkê”.

Rôh po Leh tơbleăng hlá tơbeăng lâp tơnêi têa hơnăm kố ai 87 tíu mơđah tơbleăng dêi 63 Khu chêh hlá tơbeăng kong pơlê, pơlê kong kân, 60 kơ koan chêh hlá tơbeăng Tơnêi têa ƀă kong pơlê, rơtế ƀă mâu kơbong mơđah tơbleăng ‘na mâu inâi dêi Liên Chi hô̆i: Hlá tơbeăng Nhân dân, Rơ’jiu Việt Nam, Um tơvi Việt Nam, Thŏng tâ̆n xah Việt Nam, Khu xiâm tối pơtâng tơdroăng kal tiô troăng hyôh um tơvi, rơ’jíu, internet ƀă hên ki ê ƀă tơdroăng ki veăng dêi khu mâu tíu ki hnê chêh hlá tơbeăng, kơbong ki mơđah tơbleăng dêi mâu tíu pêi cheăng tối tơbleăng mâu kế tơmeăm ‘na hlá tơbeăng – um tơvi chal nôkố.

Ki xiâm dêi rôh po Leh tơbleăng hlá tơbeăng hơnăm kố cho tơdroăng ki tối ‘na hnoăng cheăng chêh hlá tơbeăng, môi tiah po rôh tơpui tơno trâm mâ, diâp pri A Hlá tơbeăng Tơnêi têa châ mơ’no tơdrêng tung hyôh dêi Rơ’jíu Việt Nam; Rôh hôp A.I ƀă rak ngăn rơkê plĕng tơdroăng ki kal tung tíu ki rah chêh; Tơpui tơno hnê cheăng ƀă hnê tơ’nôm tơdroăng cheăng chêh hlá tơbeăng tiô tơdroăng ki rơhêng vâ.

Ing mê, ngế ki chêh hlá tơbeăng tung lâp tơnêi têa ƀă kuăn pơlê ai rôh vâ tơpui leăng ƀă hriâm ƀối ing mâu hlá tơbeăng ki rơkê, veăng kum mơdêk tâ nếo ki rơkê plĕng dêi hlá tơbeăng.