Péa Ngế xiâm pơkuâ ngăn lêng môi tuăn tối, tung pơla hdrối kố nah, tơrŭm cheăng lêng pơla péa tơnêi têa châ tơbleăng tâi tâng, ki khât, tro tiô troăng ki kăn xiâm péa tơnêi têa hiăng môi tuăn. Péa pâ pơtối rak ki tơƀrê luât pơkâ tơpui tơno, tăng ‘nâi plĕng ăm mâu kăn xiâm; mơdêk tơrŭm cheăng pơla mâu lêng rak ngăn, kring tơniăn tíu tơkăng kong, lêng tuk, kăn sát têa kơxĭ; tơrŭm ƀă hlối séa ngăn tơdjuôm, tơplâ mơdât khu ki ai xôi tơkâ luâ kong têa, khu ai xôi tê mơdró liu, khu ki ôh tá tơdrăng tung mơdró kâ.

Hên túa tơrŭm cheăng pêi ai pơxúa châ tơbleăng, mê cho: Tơrŭm pro nhŏng o pơla mâu đông, tíu pêi cheăng, tơrŭm pro nhŏng o pơla kơpong kuăn pơlê dêi péa pâ tíu tơkăng kong, ƀă mâu tơdroăng rak vế tơniăn tung rêh ối kơjo kum kuăn pơlê kơpong tơkăng kong.

Péa ngế xiâm pơkuâ ngăn lêng vâ môi tuăn pơtối ‘mâi mơnhông tơrŭm ƀă dêi rơpó; mơdêk trâm mâ, tơpui tơno tơrá mâu kăn, pơtối rak vế ki pơxúa tơƀrê tung mâu luât tơrŭm cheăng péa pâ nôkố; po rơdâ trâm mâ pơla mâu sih quan, mâu kăn lêng hơnăm ối nếo; vâ rế tơƀrê hôm tung tơdroăng hnê mâu ngế rơkê; tơrŭm krá tâ, veăng môi tuăn dêi rơpó a mâu luât pơkâ, hneăng hôp tơpui tơno dêi mâu lêng tung kơpong ƀă lâp plâi tơnêi.

Péa pâ xuân vâ môi tuăn mơnhông tơrŭm cheăng pái tơnêi têa Việt Nam - Lếo - Kul , tung mê, ai mâu rôh trâm mâ rêm hơnăm pơla  pái Ngế xiâm pơkuâ kong lêng ƀă hriâm tâp tơdjuôm ‘na hbrâ ví pơloăng mơnúa ki pro ôh tá tơniăn tơnêi têa, mê cho tŏng gum mâu ngế trâm xía vâ, hbrâ mơdât xía vâ kong prâi pro ôh tá tơniăn, hbrâ mơdât pơreăng tâ tú.