Tiô Tiê̆n sih Lương Bạch Vân, Kăn hnê ngăn Hô̆i đong Tiâ mơnhên Tơpui kâ ƀă Kuăn pơlê ki rêh ối a kong têa – Vi ƀan Măt trâ̆n Tơnêi têa Việt Nam Pơlê kong kân Hồ Chí Minh, mâu troăng hơlâ pơhlêh nếo kân pơrá ai tá tơdroăng ki tơ’lêi hlâu ƀă pơloăng mơnúa, ƀă kal tâ cho athế pro chiâng tơdroăng ki mơhnhôk kăn ƀô̆, tơmiât pêi rơkê, khên tơchĕng, khên pêi.

Jâ tối tiah kố, tung pơla klâ xoăng, pro lế lê̆m kơ koan cheăng tơnêi têa nôkố nếo bu pơtê a hvêa prôk ki hriâm – kơdroh tíu, kơdroh ngế, tung pơla tơdroăng ki xiâm cho athế pơhlêh túa tơmiât, túa pêi cheăng, vâ rêm ngế kăn ƀô̆ chiâng vâ hbrâ rơnáu pơhlêh dêi tơdroăng tơmiât chiâng ki ai khât.

“Nôkố dế xơpá, kăn ƀô̆ athế pêi cheăng hên tâ, tung pơla tơdroăng ki prôk lăm, troăng prôk ƀă hên ki ê ối hên xơpá, kal athế tơkâ luâ. Tâi tâng tơdroăng tơngah dế pơkâ tung mâu khu pêi cheăng ki nếo, pâ thế kăn ƀô̆ athế hlê plĕng, rơkê tơdroăng cheăng. Pin tơngah, rơhêng vâ, la vâ hvêa prôk chiâng ai khât mê athế rêm ngế athế mơ-eăm, athế mơ-eăm hên khât. Athế tơkâ luâ mâu tơdroăng ki môi tiah mê, mê nếo kâi vâ mơnhông tơƀrê. Á loi tiah kố pin kô pêi chiâng tơdroăng ki mê”.

Luật sư Trương Thị Hòa, phŏ hnê ngăn Tíu pêi cheăng ngế ki ối a dế tê mơdró Pơlê kong kân Hồ Chí MInh tối tiah kố vâ kăn ƀô̆ khên tơchĕng, khên pêi mê hnoăng dêi ngế ki ối a ko cho kal khât.

“Troăng hơlâ pêi pro nôkố maluâ ai hên rơkong tơpui, hên ngế ối tôu tuăn la á tơchĕng tơmiât ngế ki lâi hiăng khên pêi cho pêi, hlê plĕng nhên cho tơnôu. Pêi ‘ló mê lôi, ôh ti ai tơdroăng klâi. Nhên la kal cho luât athế tơdrăng. Mê mâu tơdroăng pơkâ dêi Đảng athế pêi pro teăm tơdrêng, troăng hơlâ tŏng gum athế pơhlêh chiâng luât. Đảng mê troăng hơlâ tơmiât pêi rơkê, rĕng lăm, ƀă hên ki ê tâi tâng pơrá rơdêi ki luât tá hâi pêi pro teăm mê hơ-ui mâu kăn ƀô̆ kong chưk.

Rak ngăn kăn ƀô̆ khên pêi ôh ti xê cho gum kơtoâ ăm tơdroăng ki xôi, mê cho rak vế tơdroăng ki tơmiât pêi rơkê xua ki pơxúa tơdjuôm. A môi víu ki ê, jâ Phạm Thị Quyên, Phŏ kăn hnê ngăn Liên đoân Lao đô̆ng kong pơlê Tây Ninh tối nhên tiah kố, ƀă mâu kăn ƀô̆ Kŏng đoân, tơdroăng ki khên tơmiât, khên pêi, khên chiu pôu râng tơdroăng cheăng athế tro ƀă tơdroăng cheăng rak vế ƀă pơxúa tro luât, tơxâng dêi ngế pêi cheăng.

“Mâu troăng hơlâ pơkâ, tŏng gum mê athế châ pơhlêh tiô luât. Nôkố, pin hiăng ai Luât Kŏng đoân, tung mê pơkâ nhên ‘na mâu hnoăng pơkuâ, hnoăng cheăng pôu râng dêi ngế kăn ƀô̆ kŏng đoân. Pakĭng mê xuân ai mâu luât pơkâ rak vế mâu kăn ƀô̆ kŏng đoân drêng pêi dêi hnoăng cheăng, tơdroăng cheăng dêi tơná, malối cho tung tơdroăng ki teăng mâ, rak vế hnoăng ƀă ki pơxúa tro luât, tơxâng dêi ngế pêi cheăng. Mê cho môi tơdroăng ki kal khât ki ngế kăn ƀô̆ kŏng đoân nôkố dế pêi”.

Sap ing víu ngăn dêi mâu ngế ki hiăng pêi cheăng tung Măt trâ̆n hên hơnăm, pôa Nguyễn Hoàng Năng, kăn hnê ngăn Vi ƀan Măt trâ̆n Tơnêi têa Việt Nam Pơlê kong kân Hồ Chí Minh hneăng hdrối, tối tiah kố troăng hơlâ pơkâ pêi tro ƀă kal, la vâ prôk troh tơdroăng ki ai khât mê xuân ối kal ai troăng hơlâ pêi pro nhên, tơdâng sap ing kơpêng troh kơdâm.

“Á tơmiât cho Hneăng hôp Đảng lâp tơnêi têa kô mơ’no mâu troăng hơlâ pơkâ pêi pro tiah lâi kô lế lê̆m tâ, vâ gum ăm mâu kăn ƀô̆ tung tơpui khên tơnôu tâ. Malối nôkố bu ối kăn pơkuâ péa râ mê tơdroăng cheăng pêi klêi kơ’nâi vâ chê la ki kơtăn xuân ôh ti xêi tơ’lêi a chê. Pơtih hdrối nah, bêng troh a pơlê krâm la nôkố sap ing bêng troh a pơlê kong kơdrâm mê ối ai môi tíu ki ‘nâng ‘nâi la tơdroăng ki vâ prôk lăm xuân ôh tá tơ’lêi hlâu. Tơngah tung la ngiâ ah mâu kăn kô veăng tơpui ăm Đảng vâ ai troăng hơlâ tŏng gum pêi pro tơ’lêi hlâu tâ”.

Ki khât gá ăm hlo, maluâ hiăng ai Pơkâ 73/2023/NĐ-CP ‘na rak vế kăn ƀô̆ kơhnâ, tơmiât pêi rơkê, xuân ối ai tơdroăng ki ví, kơ’lĕng tơpôu ăm dêi rơpó hnoăng cheăng xua kăn ƀô̆ “xâu xôi”, “xâu tăng ‘nâi hnoăng cheăng”. Kơxop mơ-éa Pơkâ nếo dêi Khu xiâm ngăn kong pơlê, hnoăng cheăng dêi mâu kăn ƀô̆ pêi ‘ló pơkâ, ôh tá xê xua ki pơxúa ăm dêi tơná la trâm ôh tá mơhúa drêng lâi ôh ti ‘nâi cho hdrê chêng prôk ki kal, troăng hơlâ hiâm mơno rak vế ngế khên tơnôu, khên pêi “pro tơdroăng loi a luât” vâ kăn ƀô̆ hmiân tuăn pêi cheăng xua ki pơxúa tơdjuôm.