Teăng mâ Kăn hnê ngăn Đảng, Tơnêi têa, jâ Võ Thị Ánh Xuân, Kăn xiâm hnê ngăn tơnêi têa pơtroh rơkong rơkâu mâu tơdroăng ki lĕm má môi troh kơ mâu ƀok thái pơkeăng, mâu kăn ƀô̆, mâu ngế cheăng ngăn ‘na kơvâ pơkeăng dêi tơnêi têa, hlối tối, Đảng, tơnêi têa đi đo tơmâng tŏng kum, kăn hnê ngăn, hnê mơhno, ‘no liăn mơjiâng tơmeăm hnoăng ‘na kơvâ pơkeăng pơlât.

Vâ ai tiô pơkâ mơnhông tơnêi têa, tơƀrê, hơniâp, malối cho pơkâ chiâng tơnêi têa ki mơnhông tơƀrê a hơnăm 2045, jâ Võ Thị Ánh Xuân tối, ki tơƀrê ‘na mơngế pêi cheăng rơkê cho ki xiâm kal khât, tung mê mơngế thế rơkê tung kơvâ cheăng khăm pơlât. Xua mê, kơvâ ngăn pơkeăng kal pơtối hnê tơ’nôm, mơdêk ai hên ngế rơkê cheăng, malối tung pơla lâp plâi tơnêi ƀă tơnêi têa dế trâm hên mâu túa pơreăng, tung mê ai mâu pơreăng ki nếo hâi chói hlo, mơnhâu ‘mêi troh ivá kuăn pơlê; vâ ai tiô pơkâ rak ngăn khăm pơlât ivá kuăn pơlê tung tơdroăng nếo nôkố.