Hngêi kơtăn rơchôa hno têa Dak Nting dâng 500 met a peăng pá kơdâm tíu hdoăng têa, ngoh K’Thu, hdroâng kuăn ngo M’Nông, thôn Quảng Tiến, cheăm Quảng Sơn, hiăng hbrâ djâ kơdrâi ƀă 2 ngế kuăn ối kŭn lo a hngêi nôu pâ peăng kơdrâi a tíu xiâm cheăm vâ hbrâ ví tơdroăng tơhnâp rơchôa têa ôh ‘nâi drêng lâi. Môi ngế ngoh K’Thu ối tung hngêi, pêi kơdrum ƀă hiâm mơno đi đo tô tuăn.

‘’Kuăn pơlê rêh ối pa rŏng rơchôa hno têa kố tô tuăn ‘nâng, kong mêi đi đo môi tiah kố kô tơhneăng rơchôa têa drêng lâi ôh tá ‘nâi. Pơkâ thế mâu râ khu râ kăn pơkuâ tâng ôh tá rơnêu, rak tơniăn tơdroăng ki tơhnâp mê ‘nhê hlối rơchôa têa vâ kuăn pơlê kơdroh ki tô tuăn. Tâng rơchôa hno têa kố mê tơhnâp mê to lâi rơpŏng kuăn pơlê parŏng rơchôa tro mơhiu tâi tâng’’.

Pôa Vũ Tiến Lư, Kăn pơkuâ hnê ngăn cheăng Đảng tơring Dak Glong, kong pơlê Dak Nông tối ăm ‘nâi, khế 8/2023, klêi kơ’nâi ai tơdroăng tơhnâp, rơheăng châ rơchôa hno têa Dak Nting, cheăm Quảng Sơn, tơring hiăng pêi pro xĕn 34 rơpŏng peăng pa rôu tíu hdoăng têa. Klêi kơ’nâi môi pơla, kuăn pơlê hiăng vêh dêi a hngêi vâ rêh ối ƀă pêi kâ. Nôkố, pơtối mot rơnó kong mêi, tơ’lêi ƀă rơchôa hno têa kố cho pá puât, kal rĕng rơnêu vâ tơniăn châ chăn ƀă kế tơmeăm khoăng ăm kuăn pơlê.

“Hno têa Dak Nting 1 hơnăm kố klêi kơ’nâi tơ’nhê mê xuân tá hâi mơnhên xiâm kối. Xua mê, á xuân pơkâ thế cho rĕng mơnhên xiâm kối klêi mê rơnêu tơmeăm kố’’.

Tơdroăng rak tơniăn, rơnêu tơmeăm hno têa Dak Nting tro tơhnâp ƀă rơheăng châ mơnhên cho thâ. Laga, pôa Phạm Tuấn Anh, Kăn pơkuâ Khu pơkuâ ‘na pêi chiâk deăng ƀă mơnhông kong pơlê Dak Nông tối dế ai tơdroăng ki ôh tá ‘nâi pro ti lâi ƀă hrá mơnhên xiâm kối xuân môi tiah rơnêu kế tơmeăm kố. Hiăng châ 1 hơnăm laga xuân tá hâi mơnhên châ xiâm kối cho xua kơchuâ bro, mơjiâng pro lơ xua kong prâi pro. Tiô pôa Phạm Tuấn Anh, ai tơdroăng mâu khu mơjiâng pro hnê mơhno ‘’ví’’ veăng mơnhên xiâm kối tơdroăng ki pro ôh tá tơniăn rơchôa hno têa.

“Tơdroăng ki pá má môi cho tăng châ tíu hnê mơhno ai tŭm ivá, mâu ngế vâ pêi pro hnoăng cheăng kố. Tung tơdroăng pêi, ngin krếo hên tíu cheăng troh vâ séa ngăn laga vâi troh séa ngăn klêi mê vâi ton tơrôu, chiâng ai tơdroăng ki hrá. Đi đo troh nôkố Viê̆n Khoa hok rak ngăn ‘na hno têa vâi nếo tơdah vâ pêi, nôkố xuân hiăng môi tuăn kô châ kĭ tơkêa vâ pêi pro hnoăng cheăng kố’’.

Tơdroăng tơkêa bro rơchôa long têa Dak Nting ai tâi tâng kơlo liăn mơ’no 137 rơtal liăn, ing kơxô̆ liăn pêi pro tơdroăng xiâm kong prâi hơ’lêh ƀă tơtêk krúa lĕm hneăng hơnăm 2016 – 2020 ƀă kơxô̆ liăn xo hdrối ing liăn ngân kong pơlê. Tơdroăng tơkêa bro xua Khu pơkuâ mâu tơdroăng tơkêa bro mơ’no liăn mơjiâng kong pơlê Dak Nông pro khu pơkuâ mơ’no liăn. Apoăng khế 8/2023, tơmeăm tro tơhnâp, rơheăng drô rơchôa têa hiăng hdoăng têa pêng. Khu hnê mơhno Tơnêi têa ‘na hbrâ, ví kong prâi pro ôh tá tơniăn xua pôa Nguyễn Hoàng Hiệp, Ngế xiâm phŏ Khu xiâm pơkuâ ‘na pêi chiâk deăng ƀă mơnhông mơdêk thôn pơlê, Kăn phŏ pơkuâ djâ hiăng tơdrêng lăm séa ngăn ƀă hnê mơhno mâu troăng pêi ki thâ xuân môi tiah ton xŏn.

Vi ƀan kong pơlê Dak Nông xuân đi đo hnê mơhno thâ mơnhên xiâm kối ƀă rơnêu kế tơmeăm khoăng, laga troh nôkố xuân ối tiah kố. Pôa Hồ Văn Mười, Kăn hnê ngăn Vi ƀan kong pơlê Dak Nông tối, ai tơdroăng ôh tá tro, ôh tá pôu râng hnoăng cheăng tung tơdroăng tơleăng, rơnêu tơmeăm hno têa Dak Nting.

“Hôp pơchân tối ƀă mơ-éa, tối hiăng hên xôh laga ôh tá pêi, tâng Dak Nting rơnó kố tơhnah tơhnâp, ai tơdroăng tơdjâk troh châ chăn kuăn mơngế, tơmeăm khoăng kơbố pôu râng hnoăng cheăng. Mê hiăng lối 1 hơnăm kố, troh nôkố nếo tăng châ khu ki vâ mơnhên, mê mơnhên a rơnó mêi kố nếo cho môi tơdroăng nếo’’.

Khu xiâm hnê mơhno thâ, kong pơlê đi đo hnăn thế, laga tơdroăng mơnhên xiâm kối ƀă rơnêu tíu ki tơhnâp, rơheăng hno têa Dak Nting, cheăm Quảng Sơn, tơring Dak Glong, kong pơlê Dak Nông, pơtối hrá. Tơdrêng amê, tơdroăng ki tơ’lêi ƀă rơchôa hno têa kố cho ôh tá ‘nâi tối hdrối tung rơnó mêi têa kân lân lu, châ chăn ƀă tơmeăm kuăn pơlê a pá xôp têa tro mơnhâu.