Kơxê lơ 21/2, pôa Phạm Minh Chính, Ngế pro xiâm hnê ngăn Chin phuh, Kăn xiâm Khu hnê mơhno Tơnêi têa mâu tơmeăm, tơdroăng tơkêa bro ki kal tơnêi têa, ki kal kơvâ Troăng klông ƀă rơxế kơtâu pơkuâ Roh hôp má 4 dêi Khu hnê mơhno.

Xông tơpui mơgêi roh hôp tơpui tơno, pôa Phạm Minh Chính mơnhên tối tơdroăng cheăng hiăng ai hên tơdroăng ki rơkê klêi roh hôp má 3 dêi Khu hnê mơhno, Ngế pro xiâm hnê ngăn tơnêi têa phiu ro mâu kong pơlê hvái ngăn tơdjuôm hiăng ai hên tơdroăng mơ-eăm tung pêi pro hnoăng cheăng cheăng.

Ki rơhêng vâ tối, Hà Nội, Pơlê kong kân Hồ Chí Minh ƀă mâu khu tơrŭm cheăng pêi cheăng hiăng mơ-eăm pêi pro 2 tơdroăng tơkêa bro troăng kân pakĭng kơxô̆ 3 a Pơlê kong kân Hồ Chí Minh ƀă troăng kân pakĭng 4 kơpong pơlê kong xiâm, ki má lối cho hiăng pêi kơtăng, tơtro tơdroăng tăng tơnêi, hbrâ tơdroăng môi tuăn dêi kuăn pơlê.

Mâu kong pơlê Đồng Tháp, Hậu Giang, Cà Mau, Đồng Nai ƀă hía hé xuân pêi pro hên tung tơdroăng kố. Nôkố, inâi mâu tơdroăng tơkêa bro ki kal tơnêi têa, ki xiâm kơvâ troăng klông ƀă rơxế kơtâu ai 21 tơdroăng tơkêa bro ki kân ƀă dâng 70 tơdroăng tơkêa bro ki ê.