Hâi lơ 21/2, a Pơlê kong kơdrâm Hạ Long, kong pơlê Quảng Ninh, Vi ƀan pơkuâ Kuô̆k hô̆i tơkŭm po Rôh hôp lâp tơnêi têa mơgêi hnoăng cheăng Hô̆i đong hnê ngăn mâu kong pơlê, pơlê kong kân ối tung tơnêi têa hơnăm 2022 ƀă tơbleăng túa pơkâ hnoăng cheăng hơnăm 2023. Pôa Vương Đình Huệ, kăn xiâm hnê ngăn Kuô̆k hô̆i pơkuâ po rôh hôp.

Tơpui a rôh hôp, ki hên mâu kăn pơrá tối nhên, Pơkâ kơxô̆ 594 dêi Vi ƀan pơkuâ Kuô̆k hô̆i hnê mơhno tơdroăng cheăng séa ngăn dêi Hô̆i đong kuăn pơlê rêm râ cho tơdroăng ki tơtro luât ki kal, ai pơxúa vâ pro hơ’lêh, tiô troăng tơdâng tơ’mô, tơƀrê tơdroăng cheăng séa ngăn dêi mâu kơ koan kuăn pơlê pôk.

Tơpui mơgêi a rôh hôp, pôa Vương Đình Huệ, kăn xiâm hnê ngăn Kuô̆k hô̆i pơkâ thế Hô̆i đong hnê ngăn mâu kong pơlê, pơlê kong kân pêi pro tro 6 hnoăng cheăng ki kal, tung mê, hriăn ngăn, ‘mâi rơnêu, ‘mot tơ’nôm vâ pêi pro tơdâng tơ’mô mâu troăng hơlâ nếo dêi Đảng, Tơnêi têa, malối cho mâu tơdroăng pơkâ dêi Khu xiâm pơkuâ tơdroăng kal kí ‘na mơnhông mơdêk cheăng kâ rêh ối pơlê pơla mâu kơpong.