Kơxê măng hâi lơ 9/3, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng pơkuâ po Rôh hôp tơbleăng Tơdroăng pêi pro dêi Chin phuh ‘na Tơpui tơdroăng cheăng kâ hơnăm 2023. Rôh hôp châ tơkŭm po klêi kơ’nâi Chin phuh pơkâ Tơdroăng Pêi pro hneăng hơnăm 2022 – 2026 pêi pro tơdroăng pơkâ kơxô̆ 15 dêi Khu pơkuâ ngăn Đảng ‘na hnoăng cheăng tơpui cheăng kâ kum mơnhông mơdêk tơnêi têa troh hơnăm 2030.

Tơpui a rôh hôp, Ngế pro xiâm hnê ngăn Chin phuh tối nhên mơdêk tơdroăng tơpui ‘na cheăng kâ cho tơdroăng pơkâ ki kân dêi Đảng ƀă Tơnêi têa pin tung hneăng hơnăm ki mơdêk xúa kơmăi kơmok, rơkê plĕng dêi tơnêi têa. Tơdroăng pêi pro dêi Chin phuh mơnhên tơdroăng pơkâ “Túa tơmiât rơkê, pêi pro kơtăng, hbrâ ví rơkê, tơƀrê, tí tăng ƀă pêi pro mâu rôh tơ’lêi hlâu ăm tơdroăng ki mơnhông tơnêi têa” ƀă pơkâ mơ’no 07 khu hnoăng cheăng ki kal ‘na tơpui cheăng kâ sap ing nôkố troh hơnăm2026.

Ngế pro xiâm hnê ngăn tơnêi têa pơkâ thế Rôh hôp tơkŭm mơnhên tối trâu rơdâ mâu tơdroăng, xúa rôh tơ’lêi vâ po rơdâ tơdroăng ki tê tơmeăm ngi kong têa ê, mơ’no liăn cheăng, ôm hyô, khoa hok – kong ngê̆, tí tăng xúa mâu ivá mơdêk nếo. Ing mê, pơkâ mơ’no mâu troăng hơlâ tơbleăng tơƀrê Tơdroăng pêi pro dêi Chin phuh, ƀă hiâm mơno bro  pơ’lêh ăm tơdroăng ki ôh tá mơhúa tơƀrê chiâng mâu rôh ki tơ’lêi hlâu; mơnhên mâu tơdroăng ki kal tŏng kum tơdrêng, tơbleăng tơdrêng; mâu troăng tơmiât, hnoăng cheăng tung rôh ki iâ hơnăm ƀă ton hơnăm.