Hâi lơ 24/3, a kong pơlê Dak Lak, Khu xiâm ngăn ‘na hnê hriâm ƀă hnê mơjiâng tuăn ngôa rơkê hiăng tơkŭm po roh hôp mơnhông hnê hriâm ƀă hnê mơjiâng a kơpong Tây Nguyên troh a hơnăm 2030 hnoăng cheăng pêi troh a hơnăm 2045 ah nếo. Tiô tơdroăng séa mơnhên tối a roh hôp, ki dâi khât dêi tơdroăng hnê hriâm râ phôh thong a Tây Nguyên dế vâ xông tơ’mô ƀă tơdroăng pêi cheăng kâ, pêi lo kế tơmeăm tơdjuôm dêi lâp tơnêi têa.

Khu thái cô ƀă mâu kăn ƀô̆ pơkuâ ngăn ‘na hnê hriâm hiăng châ tŏng kum, mơ’no liăn cheăng, mơnhông tá kơxô̆ kuăn mơngế ƀă thăm mơdêk ‘na tơdroăng hloh hlê rơkê plĕng, chôa ‘lâng mơnhông tiô kơlo ki rơkê dêi tơdroăng hnê mơhno tiô rơxông nếo. Laga, tiô mâu kăn ki rơkê tối, mâu tơdroăng ki hơ’lêh ‘na hnê hriâm ƀă hnê mơjiâng tuăn ngôa rơkê a kơpong Tây Nguyên xông tơtêk, hơ’lêh la ối hrá, tá hâi teăm tơxâng ƀă tơdroăng ki mơnhông mơdêk pêi cheăng kâ - rêh ối pơlê pơla; ki rơkê plĕng dêi mơngế pêi cheăng xuân tá hâi teăm châ tơtêk ó khât, ối trâm hên tơdroăng xahpá ƀă pơloăng mơnúa.

Tơpui mơgêi a roh hôp mê, pôa Nguyễn Kim Sơn, Ngế xiâm ngăn ‘na hnê hriâm ƀă hnê mơjiâng tuăn ngôa rơkê pơkâ thế, tung la ngiâ kố ah, mâu kong pơlê, pơlê kong kơdrâm, tơring, cheăm pơtối mơdêk, hnê hriâm, mơnhông dâi khât tung kơvâ hnoăng cheăng dêi mâu thái cô, tăng mơjiâng, rah xo mâu lâm, hngêi trung ăm i tơtro tâ, mơjiâng chiâng hên ivá cheăng tung hnê hriâm, thăm mơdêk ki rơkê, xúa mơngế tro tơdroăng, maluâ ƀă mâu hdroâng kuăn ngo, hnối pêi tơdrêng, tơdâng ƀă hnoăng cheăng kâ - rêh ối pơlê pơla.