Kơxo lơ 1/2, pôa Phạm Minh Chính, Ngế pro xiâm hnê ngăn tơnêi têa prế pôa Nguyễn Đình Khang, ngế xiâm ngăn khu pơkuâ pêi cheăng Việt Nam pơkuâ po rôh hôp mơnhên tối klêi kơ’nâi tơrŭm hnoăng cheăng pơla Chin phuh ƀă Khu xiâm pơkuâ pêi cheăng Việt Nam hơnăm 2022 ƀă pơkâ mơ’no hnoăng cheăng ki kal tơrŭm hnoăng cheăng hơnăm 2023 ƀă tung la ngiâ. A rôh hôp, mâu kăn hiăng mơ’no hên rơkong tơpui tối ‘na mâu tơdroăng klêi kơ’nâi pêi pro tơƀrê hnoăng cheăng tơrŭm tung pơla hdrối nah; mâu tơdroăng ki tơ’lêi hlâu, xơpá, cho ƀai hriâm ki rơkê; mâu troăng pơkâ ki kal vâ pơtối mơdêk tơƀrê hnoăng cheăng tŏng kum tơdroăng rêh ối ăm kŏng nhân pêi cheăng, mơjiâng giai cấp kŏng nhên Việt Nam kân rơdêi, kum kal khât tung pêi pro ƀlêi trâng tơdroăng pơkâ Hneăng hôp 13 dêi Đảng.

Ngế pro xiâm hnê ngăn tơnêi têa tối nhên, Đảng, Tơnêi têa đi đo tơmâng ngăn mơjiâng troăng giai cấp kŏng nhân rơkê plĕng, kân rơdêi ƀă tơrŭm Kŏng đoân krá rơdêi, ngăn mê cho tơdroăng ki khŏm mơ-eăm rak vế ƀlêi chiâng tơdroăng hơ’lêh nếo, hơ’lêh pêi cheăng ƀă kơmăi kơmok, hơ’lêh tơnêi têa rơkê plĕng ƀă mot tơrŭm cheăng ƀă kong têa ê. Tiah mê, athế mơjiâng Kŏng đoân Việt Nam krá rơdêi tung tâi tâng, ai ivá tơxâng hmâ ƀă pơkâ tơleăng tro mâu tơdroăng pơkâ mơ’no tung tơdroăng nếo.