Khu xiâm pơkuâ hnê ngăn Đảng Kŏng san Việt Nam, Kuô̆k hô̆i tơnêi têa Kŏng hoa xah hô̆i chuh ngiah Việt Nam, Kăn xiâm hnê ngăn tơnêi têa Kŏng hoa xah hô̆i chuh ngiah Việt Nam, Chin phuh tơnêi têa Kŏng hoa xah hô̆i chuh ngiah Việt Nam, Vi ƀan xiâm Măt trâ̆n Tơnêi têa Việt Nam, Khu xiâm Ngăn ‘na Mơdâm kiâ Tơnêi têa ƀă rơpŏng hngêi pôa Nguyễn Phú Trọng - Kăn xiâm pơkuâ hnê ngăn tung Khu xiâm pơkuâ ngăn Đảng Kŏng san Việt Nam nhuô̆m koh mơnê tâi tâng kuăn pơlê, khu pú hmâ, lêng tung lâp tơnêi têa, kuăn pơlê pin a kong têa ê ƀă pú hmâ lâp plâi tơnêi, hiăng ai hiâm mơno khi trâu rơdâ, tơdroăng ki hơ-ui pâ, mơjo khéa ki trâu hơngế ƀă nhuô̆m mơnê tá hiâm tá mơno păng ‘nâng ƀă pôa Nguyễn Phú Trọng-Kăn xiâm pơkuâ hnê ngăn; hiăng lăm troh pôu ngăn, pơtroh rơkong tơpui, pơtroh hlá kơthô, rơkong veăng síu khéa, tơdroăng ki Leh Koh tơbâ, Leh Tơbâ hnoăng, veăng lăm chiân ‘mé pôa Nguyễn Phú Trọng - Kăn xiâm pơkuâ hnê ngăn Khu xiâm Đảng Kŏng san Việt Nam ‘na hnoăng cheăng kal kân ki ôh ta la lâi kâi piu hiât dêi tơnêi têa; ngế ki khên tơnôu dêi hdroâng mơngế Việt Nam ki rơkê plěng, hloh klê ƀă khên tơnôu.

Tung mâu hâi pơla kố nah, lối rơtuh plâi nuih Việt Nam ƀă pú hmâ tung lâp plâi tơnêi vêh troh a Hà Nội, Pơlê kong kân Hồ Chí Minh ƀă pơlê xiâm Đông Hội, tíu ki tơkuăm pro Leh Mơdâm pôa Nguyễn Phú Trọng-Kăn xiâm pơkuâ hnê ngăn; lối hrĭng rơpâu ngế kuăn pơlê a rêm kơpong dêi Tơnêi têa ôh tá kho troăng prôk hơngế hơngo, ôh tá kho ƀă kong tôu, kong mêi lăm pôu, troh koh pơ’lâng, prôk drô troăng chiân ‘mé Kăn xiâm pơkuâ hnê ngăn troh a tíu ki pơtê má mơ’nui. Hiăng ai lối hrĭng ngế kăn xiâm mâu kong têa tung kơpong pơtroh hlá kơthô, tơpui phôn, mâu tơdroăng ki veăng síu khéa; lối hrĭng khu lâp plâi tơnêi veăng Lăm pôu ngăn, veăng tơmâng Tơbâ hnoăng pôa; lối rơpâu khu ƀă lối hrĭng rơpâu ngế kuăn pơlê troh lăm pôu ngăn Kăn xiâm pơkuâ; lối rơpâu khu lăm pôu ngăn a mâu kơ koan teăng mâ tơnêi têa pin a kong têa ê.

Pa môi hdroh nếo, Khu xiâm pơkuâ ngăn Mơdâm kiâ dêi Tơnêi têa ƀă rơpŏng hngêi mơnê nhuô̆m, koh mơnê hiâm tuăn ki trâu hơngế, tá hiâm tá mơno dêi kuăn pơlê, pú hmâ, mâu lêng tung lâp tơnêi, kuăn pơlê pin ki rêh ối a kong têa ê ƀă khu pú hmâ ƀă pôa Nguyễn Phú Trọng-Kăn xiâm pơkuâ hnê ngăn cheăng tung Khu xiâm pơkuâ hnê ngăn xiâm Đảng Kŏng san Việt Nam ƀă tơnêi têa, kuăn mơngế Việt Nam hlế rơkê, hloh plěng ƀă khên tơnôu.

KHU XIÂM PƠKUÂ HNÊ NGĂN ĐẢNG KŎNG SAN VIỆT NAM

KUÔ̆K HÔ̆I TƠNÊI TÊA KŎNG HOA XAH HÔ̆I CHU NGIAH VIỆT NAM

KĂN XIÂM HNÊ NGĂN TƠNÊI TÊA KŎNG HOA XAH HÔ̆I CHUH NGIAH VIỆT NAM

CHIN PHUH TƠNÊI TÊA KŎNG HOA XAH HÔ̆I CHUH NGIAH VIỆT NAM

VI ɃAN XIÂM MĂT TRÂ̆N TƠNÊI TÊA VIỆT NAM