Po ngăn trang web chêh dulich.daknong.gov.vn, châ ngăn Ki kân ngi hía, ki rơdâ, ki kân xŏn klêng ‘na long Tà Đùng hnăng lĕm môi tiah krếo tơmối troh a Dak Nông. Trang web kố, tơmối kô chiâng po tăng ngăn vâ lăm troh ôm hyô a mâu tíu ki vâi ô eăng tung kong pơlê, châ tối ăm ‘nâi mâu tơdroăng ‘na mâu tuor ôm hyô, ôm hyô hlối koi pơtê, mâu tơmối troh, xah hêi ro, kâ kơchâi kế kâ…

Kố cho môi pâ dêi tơdroăng chêh ‘măn tung kơmăi ‘na tíu ôm hyôu ki rơkê Dak Nông nếo châ mơnúa sap hâi lơ 15/12/2022. Tiô tối hdrối kơ’nâi 3 khế mơnúa, ing mê kô tối ăm ‘mâi rơnêu tíu ki hâi tro ƀă pơtối mê kô chêh klêi, tơdroăng chêh ‘mot kô xúa khât vâ ăm tơmối po tăng ngăn, mơdêk tíu ôm hyô dêi kong pơlê; tơ’lêi tung rak ngăn, mơhno tơbleăng tơmeăm, tíu ôm hyô. Tơmối kô chêh inâi tíu kâ koi ối pơtê, tơmeăm kâ, tíu hyô ngăn, prôk tiô tour vâi lăm ôm hyô, tơbâ tối pro tour tung kơmăi ôm hyô ki mê.

Rơtế ƀă mâu kăn cheăm tơring mơjiâng ƀă mơdêk lĕm tâ nếo tíu ôm hyô ngăn nhâ loăng kuăn kiâ tiô tơdroăng ôm hyô rơkê cho Grup pơkuâ hyôh phôn lêng Viettel Dak Nông.

Pôa Nguyễn Anh Tuấn, Kăn phŏ pơkuâ tối ‘na troăng rơhlâ xúa kŏng ngê̆ thŏng tin Viettel Dak Nông, ăm ‘nâi:

“Kơmăi mê kô kum ăm Khu ngăn mơhno túa lĕm tro - Tơ’noăng ivá ƀă ôm hyô Dak Nông tơbleăng mâu tơmeăm ki lĕm tro, ôm hyô ngăn tung kong pơlê. Ƀă tơmối ki troh ôm  hyô kô châ tí tăng ‘nâi plĕng, châ hlo ngăn túa lĕm tro 3D ƀă ki khât gá ảo tê ôh tá xê khât bú ăm ngăn hdrối vâ lăm troh a Dak Nông’’.

Tơdrêng ƀă tơdroăng po rơdâ mơdêk pêt nhâ loăng păn kuăn kiâ vâ ăm tơmối ôm hyô ki rơkê, kong pơlê Dak Nông dế tơrŭm ƀă Viện Hàn lâm Khoa hok ƀă kŏng ngê̆ Việt Nam tơbleăng chêh lơ gât ôm hyô điê̆n tưh kong pơlê Dak Nông. Mê cho kong pơlê ki apoăng a kơpong Tây Nguyên mơjiâng pro lơ gât điê̆n tưh ôm hyô.

Ing mê, lơgât mê kô chêh mâu tơdroăng troh mơngế ki xúa mâu tơdroăng po ngăn vâ ‘nâi ‘na tíu ôm  hyô, tơkŭm mâu tơdroăng ‘na ôm hyô ‘na troăng prôk môi tiah: Rơxế to chơ prôk ukố umê, mâu tíu ki vâ tăng rơxế chơ pơto, mung to rơxế ki pin vâ vê xêh, tơbleăng ‘na leh mơdĭng lơ mâu tour ôm hyô chu rơpâ yă… Thak sih Đào Thị Lưu Viện Hàn lâm Khoa hok ƀă kŏng ngê̆ Việt Nam tối, lơ gât ôm hyô điê̆n tưh Dak Nông vê hdró tơtro ƀă ki ai khât, ki tro:

"Lơgât ôm hyô điê̆n tưh dêi kong pơlê Dak Nông mê ngin xúa um vệ tinh Sentinel châ xup ăm 5 hâi 1 hdroh, ing mê  kum châ séa ngăn tơdroăng ki hơ’lêh dêi kơpong la ki pin ôh tá êa lăm troh a mê. Pin bú ngăn a um kô hlo xêh ki pơ’lêh vâ tối tơbleăng hdrối mâu tơdroăng, ƀă hbrâ mâu troăng rơhlâ vâ pêi  teăm tơdrêng . Ƀă lơgât mê ai tơ’nôm comment vâ tơmối ki ôm hyô tối tơdroăng ki vâi hlo ’nâi ti lâi, lơ hnê tơ’nôm kơ pin ’lo, chêh  tiâ tối nếo mâu tơdroăng ki vâi ’nâi’’.

Tí tăng ki tơ’lêi hlâu ’na Kŏng viên tơnêi tơníu lâp plâi tơnêi UNESCO, troh nôkố, Vi ƀan kong pơlê Dak Nông hiăng pơkâ ƀă ’no liăn mơjiâng pro 44  tơdroăng ôm hyô, tiô 3 tơdroăng ki xiâm, mê cho: ’’Hơ’muăn hdrôu ‘na tơdroăng on ƀă têa’’ ƀă “Idrâp chuât xơtó ing Plâi tơnêi’’. Tiô tơdroăng tối tơbleăng pơ’lêh kơxô̆ tung kơvâ ôm hyô sap hơnăm 2020- 2025, kong pơlê Dak Nông pêi ahdrối ‘na xúa kŏng ngê̆ ki rơkê má môi vâ mơdêk tơƀrê tơdroăng rak ngăn, tơbleăng ôm hyô, vâ tơ’mot hên tơmối troh ƀă mâu khu mơdró, khu ‘no liăn mơjiâng tơmeăm khoăng.

Jâ Khúc Thị Thoi, Kăn phŏ pơkuâ ngăn ‘na mơhno túa lĕm tro –Tơ’noăng ivá ƀă Ôm hyô kong pơlê Dak Nông ăm ‘nâi:

“Ngin hiăng pâ troăng rơhlâ dêi Vi ƀan kong pơlê vâ mơjiâng tơdroăng mơdêk vâ tơdroăng tơkêa ôm hyô mê tung pơla hơnăm 2022- 2025. Mê cho vâ chôa ‘lâng mơjiâng phần mềm mê cho mâu app tung phôn râng kŏng, klêi mê tơkŭm tâi tâng mâu tơmeăm ôm hyô, tíu koi pơtê drêng lăm ôm hyô, mâu tơmeăm ôm hyô, kơpong xah hêi ƀă hên tíu ki ê pro chêh ‘măn tung kơmăi rak tơdjuôm tung lâp kong pơlê ‘na kơvâ ôm hyô’’.

Ƀă hên tíu hyô ngăn ki lĕm, tíu tơbâ roh ton nah ‘na túa lĕm tro hdroâng kuăn ngo  ki lĕm tơviah, ai Kŏng viên tơnêi tíu lâp plâi tơnêi UNESCO Dak Nông - Tíu xiâm dêi mâu idrâp, Dak Nông lĕm ro tơ’mot hên tơmối troh ôm hyô tăng ngăn  vâ ‘nâi mâu kơpong tơnêi ki nếo. Tí tăng ngăn, pơtối rak vế tơmeăm khoăng, ki tơ’lêi hlâu, tơdroăng pơkâ troh hơnăm 2025 ai iâ 1 kơpong ôm hyô châ mơnhên tối râ tơnêi têa, ƀă 5 kơpong ôm hyô râ kong pơlê tơngi klêng.

Tơngah ƀă mâu hvêa chêng prôk ki nếo tung tơdroăng xúa kŏng ngê̆ ki nếo, ôm hyô Dak Nông kô mơnhông tơƀrê, cho tíu ki troh tơniăn, tơ’mot hên ngế tung tơnêi têa ƀă kong têa ê vâ troh.