Tung vâ chê 3 rơpâu ngế rơtăm  dêi kong pơlê Dak Lak mot pro lêng rôh kố ai 2 rơpâu 502 ngế  lăm pro ƀă 466 ngế veăng pêi mâu tơdroăng cheăng tung khu lêng Kŏng an kuăn pơlê. Tung kơxô̆ ki mê, dâng 15% ngế rơtăm hriâm troh đăi hok, kao đăng, trung hok chuyên nghiêp; malối ai 3 ngế kơdrâi.

A kong pơlê Dak Nông, hơnăm kố ai 852 ngế mot pro lêng ƀă 265 ngế pêi tơdroăng cheăng ‘na kŏng an kuăn pơlê. Leh pơcháu mâu ngế lăm pro lêng a kong pơlê Dak Nông châ tơkŭm po kân krip a tâi tâng 8 tơring, pơlê kong kơdrâm dêi kong pơlê, cho hâi leh dêi mâu lêng nếo. Kong pơlê xuân hiăng pêi tro mâu luât pơkâ tŏng kum ‘na lêng, malối lăm pôu, hơlêm mâu kuăn pơlê hmiân tuăn, ăm kuăn lăm pro lêng.

3.A kong pơlê Gia Lai, rôh pơcháu lêng hơnăm kố ai 2.250 ngế rơtăm lăm bro mố đô̆i, 400 ngế rơtăm bro lêng ‘na Kŏng an Kuăn plê, 30% rơtăm chêh đơn vâ bro mố đô̆i. Tiô Hô̆i đong rah xo rơtăm bro lêng, mâu cheăm, tơring a Gia Lai hiăng ai túa hbrâ rơnáu hdrối kơxô̆ vâi rơtăm vâ pơcháu tro ƀă tŭm, rak vế kơtăng, tơniăn khât.

A Kon Tum, tung kơxo hâi lơ 8/2, tâi tâng 10 tơring, pơlê kong kơdrâm dêi kong pơlê Kon Tum tơkŭm po Leh pơcháu tơdah xo rơtăm bro mố đô̆i hơnăm 2023. Tung kơxô̆ 754 ngế chêh đơn vâ bro mố đô̆i, 4 ngế cho kơdrâi ƀă 12 ngế hiăng hriâm klêi đăi hok, kao đăng. Ivá mâu rơtăm bro mố đô̆i kố cho túa má 1 châ lối 60%.

Ƀă tơdroăng ki hbrâ rơnáu krâ ‘na mâu tơdroăng, Leh pơcháu tơdah xo rơtăm bro lêng hơnăm 2023 a mâu tơring, pơlê kong kơdrâm dêi kong pơlê Kon Tum pơrá tơkŭm po tung tơdroăng ki hmái hơtĭng, la ro, cho tơdroăng ki hâi mơdĭng lăm bro mố đô̆i dêi mâu rơtăm lăm bro mố đô̆i rak vế Tơnêi têa.