Tiô tối tơbleăng dêi kong pơlê, khu kăn ngăn ‘na Chiâk ƀă Hyôh kong prâi kong pơlê hiăng pêi cheăng tơniăn, la hlo ai hên tíu ki “ối pá tơvâ tơvân”. Tung mê, tơdroăng pơkâ hdró, pơcháu tơnêi, ăm mung tơnêi, chêl thiăn, ‘mâi pro pơlê nếo ối tơvâ tơvân; mâu pơkâ ‘na pro hlá mơ-éa ki ‘nâ ối pro mơdon drêng mâu kăn pơla rêm râ hâi xoăng nhên hnoăng cheăng; Mâu ngế cheăng rak ngăn kong, ngăn pơlât mơnăn, rak ngăn hdrê loăng pơkeăng kơdê ôa hdrong ối trâm hên xơpá ‘na mơngế pêi cheăng ƀă ‘na liăn kâ; tơdroăng pơkâ hdró, pơkâ xúa tơnêi pơla hơnăm 2026 - 2030 dế pro hrá nếo ôh tá ai kơlo ki hdró pêi pro tro tiô luât ƀă tơdroăng chêh ’măn tung kơmăi tơdjêp; mâu hlá mơ-éa bro chêh inâi mah kơpong pêt, mah tâ kơxuô, ăm hlá mơ-éa phêp tơmeăm kring vế tơmeăm pê lo hâi môi tuăn dêi pó, pro tơmeăm pê lo, tê ăm kong têa ê dâi mâu khu mơdró trâm hên xơpá.

Pôa Phùng Đức Tiến tối mơgêi hâi pêi cheăng, kơdeăn khât ki hbrâ rơnáu, tối tơdrăng dêi Khánh Hòa tung mâu tơdroăng ki hlo ai khât; pơkâ thế Khánh Hòa pơtối po ngăn, pêi tơdrêng ‘mot tơdroăng chêh tung kơmăi ‘na tơnêi tíu, tơniăn môi tuăn pơla rêm râ, pro xiâm ki vâ ‘nâi nhên yă tơnêi ƀă pơklâ xúa tơnêi a chal ki nếo. Mâu tíu pêi cheăng ‘na tơdroăng mê dêi Khu xiâm thế tơrŭm ƀă cheăm bêng pêi klêi tơdroăng hnê pêi pro, vâ rak tơniăn tơdroăng cheăng rak ngăn tơnêi têa tung kơvâ pêi chiâk - hyôh kong prâi tơniăn, tơƀrê, ai tiô púi vâ pêi cheăng tro tiô pơkâ mâu kăn 2 râ.