Tiô tối tơbleăng rĕng dêi Vi ƀan Kuăn pơlê cheăm Yang Mao, rôh kong mêi kân ton tung mâu hâi hdrối hiăng tơ’nhiê hên tơmeăm tung cheăm. Riân ki lŭp tâi tâng lối 40 rơtal liăn. Klêi tâng tối ƀă lăm ngăn a mâu tíu tơnêi tơhnâp ó, pôa Tạ Anh Tuấn, Kăn hnê ngăn Vi ƀan Kuăn pơlê kong pơlê Dak Lak tối cheăm Yang Mao pơtối ai tơnêi tơhnâp xua têa mêi hên, tơnêi rơnâk ƀă hên kơpong ngo kŭn, ngo lĭng ôh tá ai loăng vâ râk tơnêi. 

Troh a tíu kố, Kăn hnê ngăn Vi ƀan Kuăn pơlê dêi kong pơlê pơkâ mâu kăn cheăm khŏm thế djâ tâi kuăn pơlê ki rêh ối a kơpong rơ-iô lăm ối tíu tơniăn, malối ai lối 20 rơpŏng dế ối a tíu ki rơ-iô khât. Tơdroăng djâ kuăn pơlê thâ rĕng pêi hlối, ôh tá tơkôm têa xiâ.

-Pôa Dương Mah Tiệp, Phŏ Kăn hnê ngăn Vi ƀan kong pơlê Gia Lai nếo kĭ mơ-éa pơkâ mâu cheăm, bêng Khu pơkuâ kơvâ cheăng tung kong pơlê hbrâ pêi pro mâu troăng hbrâ ví kong mêi têa kân lân lu ƀă tơnêi tơhnah tơhnâp, vâ kơdroh hên tro lŭp tơmeăm xua kong prâi pro.

Tiô mơ-éa kal, Vi ƀan mâu cheăm, bêng thế séa ngăn krá tơniăn mâu tơdroăng tơbleăng, tối hdrối kong mêi kân; tối ‘na tơdroăng long rơchôa têa, tơ’lêi têa lân lu, têa rơlêa, tơnêi tơhnah tơhnâp... ƀă teăm tơdrêng tối tơbleăng troh khu râ kăn pơkuâ, kuăn pơlê hbrâ ví.

Mâu cheăm, bêng hbrâ xĕn kuăn pơlê lo ing kơpong rơ-iô; hbrâ tŭm kế kâ, tơmeăm ki kal xúa rêm hâi a tíu ki xĕn, ki rơhêng vâ tối a tíu tơ’lêi tơhnah tơhnâp ƀă luô trâu. Khu cheăng, rơxế, kơmăi kơmok, plong tuk hbrâ châ pơkâ pêi tiô troăng ‘’4 tơdrêng’’ vâ hbrâ ví kong mêi kân ton xŏn, ki má lối cho a mâu kơpong tơ’lêi ôh tá chiâng vâ prôk lăm a dêi pó.

-Kong mêi têa lân lu péa hâi hdrối a Khánh Hòa hiăng pro 8 ngế hlâ, 2 ngế hía, 19 ngế tro rong; lối 7.000 ha báu prá alâi tro têa lu trâu; hên tơmeăm khoăng tơ’nhiê. A rôh hôp thâ hnê mơhno tơdroăng cheăng tơkâ luâ xơpá xua kong mêi têa lân lu, pôa Nghiêm Xuân Thành Kăn hnê ngăn Tỉnh ủy kong pơlê Khánh Hòa  pơkâ thế Khu xiâm ngăn pơkeăng kong pơlê  rah  mâu ƀok thái pơkeăng, tơmeăm pơlât tê kơtê  ăm kuăn pơlê ki trâm pá; xúa luât pơkâ  liăn ngân kum kuăn pơlê vâ rĕng tơniăn tung rêh ối.

Pôa Nghiêm Xuân Thành  tối nhên bú po troăng prôk ngăn la lâi hiăng tơniăn khât; mâu ngế cheăng tŏng gum mâu ki xơpá thế rơrŭm krá, tơniăn tung pơla lăm tăng. Mâu cheăm ki ôh tá tơniăn thế hbrâ tŭm mâu xơrế, plong, ếo chá, tơmeăm kal tŏng kum, xúa pơ’lêh kơxô̆ tung tối  blăng ƀă hbrâ ví xía vâ kong mêi têa lân lu.