Hâi lơ 13/12, a pơlê kong kơdrâm Ƀuôn Ma Thuột, Khu xiâm Rak ngăn kơchơ tê mơdró tơkŭm po Rôh hôp Tơbleăng hnoăng cheăng rak ngăn kơchơ mơdró tung rôh Têt Lo hơnăm nếo Quý Mão 2023 a mâu kong pơlê kơpong Tây Nguyên. A rôh hôp, teăng mâ Khu rak ngăn kơchơ mơdró mâu kong pơlê hiăng mơnhên tối khât, tơpui tơno ‘na hnoăng cheăng rak ngăn kơchơ mơdró tung hơnăm 2022 ƀă kơxop hlá mơ-éa tối tơbleăng ‘na kơchơ mơdró hdrối, tung ƀă klêi kơ’nâi Têt Lo hơnăm nếo Quý Mão 2023, malối cho mâu tơdroăng ki tơdjâk troh mâu kế tơmeăm têa châu têa kơxăng, kế tơmeăm tê tung rôh Têt lo hơnăm nếo, tơdroăng ki lu lêa, pro xôi tung kơvâ cheăng kế tơmeăm tê mơdró điê̆n tưh.

Tơpui a Rôh hôp, pôa Trần Hữu Linh, kăn pơkuâ ngăn kơchơ tê mơdró tối nhên, hơnăm kố Têt Lo hơnăm nếo ƀă Têt khôi hmâ hiăng vâ chê troh, tơdroăng ki roê kế tơmeăm dêi kuăn pơlê xuân tâk hên tung la ngiâ. Xua mê, pơkâ thế khu rak ngăn kơchơ mơdró mâu kong pơlê kal mơdêk séa ngăn kơchơ mơdró, pơxâu phâk kơtăng mâu ngế ki pro xôi luât ‘na tê mơdró, tơtrŏng séa ngăn, pơxâu phak mâu khu tơrŭm, mâu ngế krê ki pro pơxúa ‘na tơdroăng ki tê mơdró kế tơmeăm pro to kơnâ a rôh Têt vâ mơdêk yă ôh tá tro, pro ôh tá tơniăn tung kơchơ mơdró, malối cho ƀă mâu kế tơmeăm ki châ xúa hên tung rôh Têt Lo hơnăm ƀă Têt khôi hmâ hơnăm 2023.