*Pôa Đinh Kre, kăn pơkuâ hnê ngăn Đảng cheăm Kon Pne, tơring Kƀang, kong pơlê Gia Lai ăm ‘nâi: cho cheăm kơpong pá puât dêi tơring Kƀang, kong pơlê Gia Lai, xua mê, ƀă hnoăng cheăng cho ngế ki ối a ko dêi cheăm, tơná pôa Đinh Kre đi đo hriâm ƀối tiô Pôa tung hiâm mơno hbrâ kơchăng djâ troăng ahdrối. Cho môi ngế đảng viên, Đinh Kre ôh ti xê to gum vâi krâ nhŏng o mơnhông chăng kâ, mê pôa ối kơhnâ hnê tối mơhnhôk kuăn pơlê pêi pro tro troăng hơlâ pơkâ dêi Đảng, Luât dêi Tơnêi têa ƀă mâu tơdroăng tơ’noăng pâ nhuô̆m tơnêi têa troh kuăn pơlê tung rơpŏng hngêi, hdroâng hdrê. Tiô pôa Đinh Kre, hriâm tâp ƀă pêi tiô tuăn tơmiât, túa rêh ối Hồ Chí Minh pâ thế rêm râ đảng, khu pơkuâ hnê ngăn cheăng Đảng ƀă đảng viên athế mơdêk hiâm mơno, pôu râng hbrâ kơchăng tung tá pái tơdroăng ki kal: hriâm a Pôa, pêi tiô Pôa ƀă djâ troăng ahdrối.

“Á hlo tơdroăng hriâm tâp ƀă pêi tiô rơkong Pôa hnê xuân hiăng châ mot tung tơdroăng rêh ối dêi vâi krâ nhŏng o, xuân môi tiah mơhnhôk vâi krâ nhŏng o đi đo tơrŭm. Tơná mâu kăn ƀô̆, đảng viên hiăng pêi tiô rơkong Pôa hnê ‘nâi tơrŭm, kơdĭng, đi đo hnê mơhno vâi krâ nhŏng o ‘nâi tŏng gum dêi rơpó mơjiâng tơdroăng rêh ối nếo tơniăn lĕm.

*Plâ tơdroăng rêh ối pêi hnoăng cheăng Kăch măng, Pôa Hồ Chí Minh, Kăn xiâm hnê ngăn tơnêi têa hneăng hdrối đi đo tối troh mâu tơdroăng djâ troăng ahdrối a ngiâ kuăn pơlê dêi ngế kăn ƀô̆, đảng viên, ahdrối cho djâ troăng ‘na troăng tơmiât, hiâm mơno lĕm, troăng rêh ối. Đảng viên K’Nam, Khu pơtâng tối mơhnhôk kuăn pơlê tơdroăng cheăng Đảng tơring Di Linh, kong pơlê Lâm Đồng tối ăm ‘nâi, klê plĕng troăng tơmiât mê, tung pơla kố nah, ngoh ƀă mâu đảng viên ki ê tung tíu cheăng đi đo hriâm tâp ƀă pêi tiô Pôa tung rêm hnoăng cheăng, ki má môi cho tung môi tuăn prôk hdrối pêi pro mâu tơdroăng tơ’noăng pâ nhuô̆m tơnêi têa, tơdroăng tơdjuôm ivá mơjiâng thôn pơlê nếo, kơ’nâi mê mơhnhôk kuăn pơlê tung tơring pêi pro tiô.

“Kơtăn kố 55 hơnăm, cho a hơnăm 1969, ahdrối kơtê i hiâm, Pôa Hồ Chí Minh, Kăn xiâm hnê ngăn tơnêi têa hiăng chôu ‘măn ăm tâi tâng Đảng, tâi tâng kuăn pơlê, tâi tâng khu lêng pin Mơ-éa tối pơchân ki krih tơviah. Kố cho mơ-éa ki kal ki kơnâ, chiâng ing mâu tơdroăng ki má môi ‘na hiâm mơno ‘na tuăn tơmiât ƀă ‘na hnoăng vâ pêi pro ki lĕm tro, po troăng mơnhông ăm kăch măng Việt Nam hâi kố ƀă la ngiâ. Hlê plĕng nhên tơdroăng ki mê, á xuân môi tiah mâu kăn ƀô̆, đảng viên tung tơring đi đo mơ-eăm tâi ivá tơná tung tơdroăng cheăng, đi đo mơ-eăm hriâm tâp ƀă pêi tiô troăng tơdjâ hiâm mơno Pôa Hồ’’.

 *Pôa Điểu MBrâng, hdroâng M’Nông, cho ngế ki châ kuăn pơlê loi a ƀon Dak R’Mon, cheăm Dak R’Moan, pơlê kong kơdrâm Gia Nghĩa, kong pơlê Dak Nông. Pôa Điểu MBrâng nếo hâk tơngăm cho môi tung 27 ngế teăng mâ dêi Pơlê kong kơdrâm Gia Nghĩa veăng hôp a Hneăng hôp Măt trâ̆n Tơnêi têa Việt Nam kong pơlê Dak Nông rôh má V, pơla hơnăm 2024-2029. 55 hơnăm pêi pro tiô hlá mơ-éa chêh Tối pơchân dêi Pôa Hồ, pôa Điểu MBrâng ăm ‘nâi, vâi krâ nhŏng o tung pơlê đi đo chôu vế rơkong hnê pơchân dêi Pôa. Vâi krâ nhŏng o tung pơlê đi đo tơrŭm, loi tung tơdroăng pơkuâ dêi Đảng, pơkuâ ngăn dêi khu kăn. Vâi krâ nhŏng o xuân kơhnâ pêi pro mâu tơdroăng tơ’noăng, mâu rôh mơhnhôk, malối cho rôh mơhnhôk mơjiâng thôn pơlê nếo. Hên rơpŏng hiăng pleăng tơnêi, veăng gum hâi pêi cheăng vâ pro mâu kế tơmeăm troăng prôk. Hriâm tâp, pêi tiô rơkong Pôa Hồ, vâi krâ nhŏng o tung pơlê Dak Nông đi đo tơrŭm, môi hiâm mơno mơjiâng pơlê cheăm, tơnêi têa kro mơdrŏng lĕm.

“Pôa Hồ xuân ối đi đo mơdoh hiâm mơno trâu rơdâ ăm vâi krâ nhŏng o a Tây Nguyên ƀă vâi krâ nhŏng o pin xuân đi đo chôu vế rơkong hnê pơchân dêi Pôa Hồ. Hriâm tâp, pêi tiô troăng tơdjâk dêi Pôa, vâi krâ nhŏng o athế đi đo tơrŭm, môi hiâm mơno, loi bă tiô Đảng, Tơnêi têa. Vâi krâ nhŏng o tung pơlê kô mơ-eăm pêi cheăng kâ, mơjiâng pơlê cheăm, tơnêi têa rế hía rế kro mơdrŏng lĕm”.

*Nâ Ham, 35 hơnăm, cho môi ngế kăn ƀô̆ Mât trâ̆n cheăm Chư Á, pơlê kong kơdrâm Plei Ku, kong pơlê Gia Lai. Hên hơnăm hdrối mê hía nah, nâ đi đo hriâm tâp ƀă pêi tiô troăng tơdjâ, hiâm mơno Hồ Chí Minh, đi đo ‘măn tơdroăng ki pơxúa dêi kuăn pơlê ối má môi. Ƀă hiêm mơno pôu râng hnoăng cheăng, nâ thăm mơhnhôk, pơtâng tối kuăn pơlê loi tơngah a troăng prôk, troăng pơkâ pêi, troăng hơlâ dêi Đảng ƀă Tơnêi têa. Nâ đi đo trâm, gum, tiâ tối mâu tơdroăng ki vâi ‘nâi plĕng dêi kuăn pơlê ƀă mơhnhôk vâi veăng pleăng tơnêi pro troăng kân, pêi pro mâu tơdroăng thôn pơlê nếo. Kơnôm mê, nâ hiăng gum mơdêk hlê plĕng, rŭm môi tuăn pơlê pơla a cheăm. Tơdrêng amê nâ xuân châ kuăn pơlê hâk vâ, nhuô̆m pâ ƀă cho um méa eăng bâ  tung tơdroăng hriâm tâp ƀă pêi tiô troăng tơdjâ Hồ Chí Minh a cheăm. Nâ tối ăm ‘nâi:

”Á đi đo mơhnhôk rêm ngế pêi mâu tơdroăng ki lĕm, ‘nâi tŏng gum dêi pó, ƀă ôh tá tơmâng tiô rơkong lông thế dêi mâu ngế ‘mêi. Tung mâu hâi leh, á pơchân tối kuăn pơlê chuâ hlá cơ vâ mơhno hiâm mơno pâ nhuô̆m tơnêi têa ƀă pâ mơnê mâu ngế khên tơnôu hiăng pleăng châ chăn mơheăm chhá vâ gâk kring tơniăn, vâ pin ai tơdroăng rêh ối phâi hơtô, hơniâp lĕm môi tiah hâi kố’’.

*Ing hiâm mơno pâ nhuô̆m Pôa Hồ, mê nếo châ hriâm xo xua ai hiâm mơno tơkâ luâ pá puât dêi kơpong pơlê ai hên khôi hmâ kăch măng, ngoh A Lấu 38 hơnăm, hdroâng Rơteăng, cheăm Măng But, tơring Kon Plông, kong pơlê Kon Tum ôh tá xâu tơdroăng ki troăng prôk pá puât hngế hngo ƀă tơdroăng rêh ối xơpá dêi rơpŏng kơhnâ hriâm tâp. Nôkố, ngoh cho kăn ƀô̆ ngăn ‘na chiâk deăng cheăm Măng Cành, tơring Kon Plông. Ngoh A Lấu tối nhên, bu ai to Đảng, ai Pôa Hồ nếo pro pơxúa phâi hơtôu, troăng prôk tơ’lêi hlâu, hngêi pơkeăng khăm pơlât, hnê hriâm ƀă hên ki ê troh ƀă mơngế Rơteăng a Măng But. Xua mê châ hnoăng cheăng, pleăng veăng kum mơjiâng pơlê cheăm, ngoh A Lấu đi đo mơeăm tung hnoăng cheăng dêi tơná, tơdrêng amê hlối kơhnâ, hbrâ rơnáu xêh hriâm ƀă pêi tiô troăng tơdjâ Pôa Hồ:

“Pêi pro Rôh mơhnhôk “Hriâm tâp ƀă pêi tiô hiâm mơno, túa rêh ối troăng tơdjâ Hồ Chí Minh” kăn ƀô̆ cheăm, thôn ƀă tâi tâng vâi krâ nhŏng o pơrá pêi pro kơtăng. Rêm hơnăm, a cheăm châ tơbleăng tơdroăng hriâm tâp ƀă nâl hdroâng kuăn ngo tơná gum vâi krâ nhŏng tơmâng tơ’lêi hlê, tơ’lêi ‘nâi ‘na tơdroăng ki kal dêi rôh mơhnhôk. Tơdroăng rêh ối kuăn pơlê a cheăm ki hên cho pêi chiâk deăng, hnoăng cheăng pôu râng dêi kăn ƀô̆ ngin cho hnê mơhno, mơhnhôk vâi krâ nhŏng o tơrŭm, loi tung troăng hơlâ pơkâ dêi Đảng, pêi tiô rơkong hnê pơchân dêi Pôa Hồ, vâi krâ nhŏng o châ hriâm ƀối hên mâu tơdroăng ki nếo, hlê plĕng ‘na khoa hok kih thuât vâ mơnhông cheăng kâ rơpŏng hngêi”.

*Cho đông lêng kăch măng tung rơxông tơplâ xâ Mih, ƀuôn Pa, cheăm Čư Prao, tơring M’Drak, kong pơlê Dak Lak hiăng pơhlêh tâi tâng, tơdroăng rêh ối kuăn pơlê hdroâng kuăn ngo... hiăng pơhlêh, mơnhông. Tung pơlê nôkố ai vâ chê 200 rơpŏng, lối 800 pơ’leăng mâ mơngế, tâi tâng mâu rơpŏng pơrá ai um tơvi, rơxế honđa, phôn râng kŏng rơkê; châ xúa on tơhrik tơnêi têa, tâi tâng kuăn ‘nĕng tung pơlê pơrá troh hngêi trung. Ƀuôn Pa nếo châ mơ’no liăn pro 6 troăng kân ƀă tâi tâng xŏn lối 6km, châ xúa 1,2 km tơmeăm “Bâ eăng pơlê xiâm” xua Khu pơkuâ Đoân droh rơtăm Dak Lak tơrŭm ƀă Khu pơkuâ kŏng ti on tơhrik Dak Lak pêi pro. Pôa Y Tuân Ksơr, Kăn pơkuâ hnê ngăn Chi ƀô̆ ƀuôn Pa tối ăm ‘nâi:

‘’Hdrối nah kuăn pơlê pá puât, ing on tơhrik, troăng kân. Nôkố kơnôm troăng pơkâ pêi troăng hơlâ dêi Tơnêi têa, pơlê hiăng on tơhrik, troăng kân lĕm, hngêi pơkeăng cheăm, hngêi trung hriâm, pơlê chôa ‘lâng tơtêk. Kuăn pơlê loi tơngah, tơmâng ƀă pêi tiô rơkong Pôa Hồ hnê, pêi tiô mâu pơkâ luât dêi Đảng ƀă Tơnêi têa”.