Pôa Y Luyện Niê Kdăm, kăn Kuô̆k hô̆i hneăng X, kăn hnê ngăn cheăng Đảng kong pơlê Dak Lak hneăng hdrối tối, cho ngế ki ai hên pơhlêh nếo rơdêi, mâu tơdroăng pêi dêi Kăn xiâm hnê ngăn Đảng - pôa Nguyễn Phú Trọng pơrá châ kuăn pơlê loi, kuăn pơlê hâk mơnâ, kuăn pơlê vâ khât.

 “Pôa prôk lêk lôi cho hiăng hía môi ngế kuăn ki kơhnâ rơkê dêi Đảng, dêi Tơnêi têa, dêi kuăn pơlê. Pôa cho kăn xiâm pơkuâ hnê ngăn Đảng hiăng lăm pôu kong pơlê Dak Lak, cho ngế kăn tơmâng ngăn khât troh hdroâng kuăn ngo, tơdroăng rêh ối pơlê pơla, tơdroăng cheăng kâ dêi kuăn pơlê, mê cho tơdroăng ki tơmâng ngăn má môi”.

Chốu vế rơkong hnê pơchân dêi pôa Nguyễn Phú Trọng - Kăn xiâm pơkuâ hnê ngăn cheăng Đảng a Hneăng hôp khu kăn lâp tơnêi têa Khu Droh rơtăm Kŏng san Hồ Chí Minh rôh má XII, nâ H’Hương Ƀuôn Krông, kăn pơkuâ hnê ngăn Đoân Droh rơtăm Pơlê kong kơdrâm Ƀuôn Ma Thuột, kong pơlê Dak Lak xo mê pro ivá vâ hriâm xêh ăm dêi tơná. Malối cho djâ troăng ahdrối tung tơdroăng ki hriâm ƀối túa rêh ối kăch măng; djâ troăng ahdrối tung hriâm tâp, hriâm pât dêi hiâm mơno, tung pêi cheăng, tung tơmiât; djâ troăng ahdrối tung pêi pro hnoăng cheăng kal kí:

“Mê cho ivá vâ á pơtối hriâm tâp ƀă pêi tiô túa rêh ối hiâm mơno Hồ Chí Minh ƀă mâu túa rêh ối dêi Kăn xiâm pơkuâ hnê ngăn cheăng Đảng. Hriâm ing meh tơdroăng ki têm rơpiât, hriâm tâp tơdroăng ki kơhnâ, kơdĭng, tơdrăng, hiâm mơno lĕm. Pơtối hriâm tâp mâu túa rêh ối lĕm tro, ôh tá xâu pá ƀă kơdo mơ-eăm vâ mơjiâng môi ivá khên tơnôu kal kí krá rơdêi, a hiâm mơno krúa, tuăn ngoâ rơkê, túa tơmiât kân”.

Tung rôh lăm pôu, pêi cheăng a kong pơlê Kon Tum a khế 4/2011, Kăn xiâm pơkuâ hnê ngăn Đảng, Kăn xiâm hnê ngăn Kuô̆k hô̆i - pôa Nguyễn Phú Trọng mơdoh chôu lăm pôu vâi krâ nhŏng o hdroâng Bơhnéa a pơlê Đăk Mút, cheăm Đăk Mar, tơring Đăk Hà. Akố, Kăn xiâm pơkuâ hnê ngăn Đảng tăng ‘nâi ‘na tơdroăng rêh ối, tơmâng mâu tơdroăng ki tối rơhêng vâ dêi kuăn pơlê ƀă pơchân  kuăn pơlê mơdêk hiâm mơno tơrŭm, tơmiât rơkê tung pêi cheăng.

Klêi kơ’nâi 13 hơnăm Kăn xiâm pơkuâ hnê ngăn Đảng, Kăn xiâm hnê ngăn Kuô̆k hô̆i - Nguyễn Phú Trọng troh pôu, nôkố hiăng pơlêh khât tung pêi cheăng kâ ƀă tơdroăng rêh ối dêi kuăn pơlê thôn Đăk Mút, cheăm Đăk Mar, tơring Đăk Hà, kong pơlê Kon Tum, mê pôa chôu vế rôh tơpui tơno dêi Kăn xiâm hnê ngăn Đảng ƀă vâi krâ nhŏng tung pơlê.

“Kăn xiâm hnê ngăn Đảng pơchân vâi krâ nhŏng o đi đo tơrŭm, tŏng kum dêi rơpó, rơtế mơnhông cheăng kâ rơpŏng hngêi. Nôkố hngêi ki lâi tung pơlê xuân mơnhông cheăng kâ châ tơniăn, ai loăng kơphế châ rak ngăn tro kih thuât, plâi kơtốu lĕm. Tâng tơdroăng pôa prôk lêk, vâi krâ nhŏng o bô bố xuân khéa ƀă rơtế dêi rơpó mơdoh môi iâ chôu tơbâ troh Meh, mơhno hiâm mơno mơnê Meh cho Kăn xiâm pơkuâ hnê ngăn Đảng hiăng hnê kuăn pơlê túa pêi cheăng. Vâi krâ nhŏng o rơhêng vâ Meh châ tơniăn lĕm”.

Pôa Lê Xuân Hưng, Kăn pơkuâ hnê ngăn Đảng cheăm Đăk Mar, ăm ‘nâi, 13 hơnăm hơ’lêh nếo, thôn Đăk Mút hiăng mơjiâng ƀlêi chiâng thôn pơlê nếo. Pơtối hên hơnăm hlối châ rêm râ khĕn kơdeăn ‘na ki rơkê a hên kơvâ. Rôh lăm pôu dêi kăn xiâm pơkuâ hnê ngăn Đảng, Kăn xiâm hnê ngăn Kuô̆k hô̆i - pôa Nguyễn Phú Trọng drêng mê nah cho ivá mơhnhôk hiâm mơno kal khât kum kăn ƀô̆, đảng viên rơtế ƀă kuăn pơlê tung cheăm tơrŭm mơ-eăm pêi klêi mâu tơdroăng pơkâ mơ’no.

“Troh hơnăm 2014, cheăm Đăk Mar ngin plah cheăm thôn pơlê nếo. Ing mê, troh nôkố pêi pro tiô rơkong pơchân, hnê dêi kăn xiâm pơkuâ hnê ngăn Đảng, vâi krâ nhŏng o, tâi tâng kăn ƀô̆, đảng viên pêi pro tơdroăng ki mơnhông cheăng kâ, pơlê pơla rơkê plĕng malối cho hơ’lêh pêt mâu hdrê loăng, mơnăn păn. Troh nôkố, ngin hiăng pêi lo liăn rêm ngế châ 56 rơtuh. Hơnăm 2022, cheăm Đăk Mar ngin hiăng plah cheăm thôn pơlê nếo, châ mơdêk ƀă ngin xuân dế mơjiâng cheăm thôn pơlê nếo tiô túa nếo a hơnăm 2025”.

Ƀă vâi krâ nhŏng o mâu hdroâng kuăn ngo a cheăm Ayun, tơring Čư̆ Sê, kong pơlê Gia Lai, Kăn xiâm pơkuâ hnê ngăn Đảng - pôa Nguyễn Phú Trọng ôh ti xê to ngế kăn xiâm pơkuâ plâ rơxông xua tơnêi têa, xua kuăn pơlê, mê ối cho ngế ki hiăng chôu ‘măn ăm vâi krâ nhŏng o tơdroăng rêh ối phâi hơtô. Tung rôh lăm pêi dêi hnoăng cheăng a Gia Lai khế 2/2017, Kăn xiâm pơkuâ hnê ngăn Đảng - pôa Nguyễn Phú Trọng - hiăng troh pôu cheăm Ayun – môi to cheăm ki malối xơpá a tơring Čư̆ Sê. Tơmâng mâu tơdroăng tơchĕng tơmiât, tơdroăng púi vâ dêi vâi krâ nhŏng o ai têa tuâm vâ tôh klâng chiâk, Kăn xiâm hnê ngăn Đảng hiăng hnê mơhno kong pơlê tơkŭm liăn ngân vâ bro long têa Plei Keo. Péa hơnăm kơ’nâi, rơchoâ têa Plei Keo hiăng bro klêi hiăng ‘mot têa ing kroăng (‘Yun) Ayun troh a klâng pro pơxúa phâi hơtôu ăm kuăn pơlê. Pôa Đinh A Nhur, 73 hơnăm, a pơlê A Chông, cheăm (‘Yun) Ayun tối:

“Drêng Kăn xiâm pơkuâ hnê ngăn Đảng - pôa Nguyễn Phú Trọng lăm pôu, á phiu ro khât, tơmiât hiăng ai têa. Nôkố têa kroăng (‘Yun) Ayun hiăng pêng plế troh a kĭng, troh ngo, hdrối mê nah ôh ti ai têa. Phiu ro khât, môi hơnăm ing 2 troh 3 rơnó pêi klâng mê vâi krâ nhong o ôh tá kơklêa xếo”.

Ai long têa Plei Keo, kuăn pơlê cheăm Ayun hiăng mơdâ pêt lối 300 hectra báu klâng 2 rơnó, tơniăn tơdroăng rêh kâ ối. Pôa Đinh Miơch, krâ pơlê, pơlê A Chông, hâk mơnâ khât tơdroăng kố dêi Kăn xiâm pơkuâ hnê ngăn Đảng ƀă vâi krâ nhŏng o a cheăm (‘Yun) Ayun.

“Vâi krâ nhŏng o phiu ro drêng Kăn xiâm pơkuâ hnê ngăn Đảng - pôa Nguyễn Phú Trọng hnê mơhno ăm kuăn pơlê bro long têa mê tơdroăng rêh ối rế hía rế tơtêk. Ngin kô chôu vế đi đo hnoăng dêi Meh hiăng ăm kuăn pơlê Ayun tung hâi kố ƀă tung xo ah hmôi”.

Ing mâu rôh lăm troh ki khât, ‘nâi nhên tơdroăng, tơmâng mâu rơkong tơpui, pâ thế tơxâng dêi kuăn pơlê hdroâng kuăn ngo Tây Nguyên, Kăn xiâm pơkuâ hnê ngăn Đảng - pôa Nguyễn Phú Trọng hiăng hnê mơhno kăn pơkuâ kong pơlê pêi pro mâu troăng tŏng gum kơjo ăm kơpong hdroâng kuăn ngo a Tây Nguyên. Ing mê, hiăng gum kuăn pơlê mâu hdroâng kuăn ngo tíu kố rế hía rế phâi hơtô, hơniâp ro. Vâi krâ nhŏng o mơnê pôa Nguyễn Phú Trọng - Kăn xiâm pơkuâ hnê ngăn Đảng hên khât!