Hơnăm hriâm kố, lâp tung kong pơlê ai vâ chê 500.000 ngế hok tro rêm râ, tung mê, ai hok tro kuăn ngo châ lối 35%. Leh mot hơnăm hriâm nếo 2024-2025 a hngêi trung râ má pái hnê kuăn ngo ai tíu kâ koi ối pơtê Nơ Trang Lơng, pơlê kong kơdrâm Ƀuôn Ma Thuột, kong pơlê Dak Lak, hngêi trung ‘nâi nhên hnoăng cheăng ki kal cho mơdêk ki tơƀrê dêi tơdroăng hnê hriâm cho tơdroăng hnê hriâm ki xiâm.

Malối hngêi trung tơmâng khât ƀă tăng troăng hơlâ vâ pêi tơƀrê ‘na tơdroăng hnê hriâm krê ƀă mâu hngêi trung hnê kuăn ngo ai tíu kâ koi ối pơtê mê cho hnê hriâm ‘na kuăn ngo ƀă hnê ‘na rak túa lĕm tro dêi kuăn ngo tung hngêi trung. Leh pơxiâm mot hơnăm hriâm nếo 2024-2025, a mâu hngêi trung ing kơpong xiâm troh a mâu kơpong hngế hngo, kơpong hdroâng kuăn ngo hiăng po tơ’lêi, ai pơxúa ƀă ro ăm thái cô ƀă hok tro kong pơlê Dak Lak tung hơnăm hriâm nếo. 

-Kơxo lơ 5/9, lối 400 rơpâu hok tro a kong pơlê Gia Lai hiăng kơdrâm kơdrĕng phiu ro veăng Leh pơxiâm po mot hơnăm hriâm nếo 2024 – 2025. A Hngêi trung râ má môi Võ Thị Sáu, pơlê kong kơdrâm Plei Ku, kong pơlê Gia Lai, Hô̆i đong Đô̆i Trung ương (ối tung Trung ương Đoân Droh rơtăm Kŏng san Hồ Chí Minh) hiăng pêi pro tơdroăng pêi cheăng Đô̆i ƀă tơdroăng pêi vâi hdrêng hơnăm hriâm 2024 – 2025 ƀă diâp 526 lơgât Việt Nam rơtế hên kơxuô tơmeăm ki kơnâ ăm hok tro hngêi trung môi tiah 1 rơpâu kên pâng rơnŏng khêi, 13 hlá cơ Đô̆i, rơtế hên tơmeăm hbrâ ăm hriâm tâp ƀă kơpong xah hêi ăm vâi hdrêng ƀă tâi tâng kơnâ lối 256 rơtuh liăn. Hơnăm hriâm 2024 – 2025, kong pơlê Gia Lai ai 759 tíu hnê hriâm ƀă lối 400 rơpâu hok tro a mâu râ hriâm.

-Xuân tung kơxo lơ 5/9, lối 7.000 ngế hok tro ƀă mâu thái cô 29 to hngêi trung a tơring Kon Plông, kong pơlê Kon Tum xuân hiăng po leh mot hơnăm hriâm nếo. Tơdroăng ki tơviah hlo a hên lâm hriâm klêi leh  cho mâu vâi o hok tro châ mơnúa thái kô kơ-êng ngăn vâ ‘nâi ki rĕng hlê ƀeăn tung hbrâ ví tơnêi tơdro.

Thái Lê Văn Đồng, Kăn phŏ Ƀơrô ngăn hnê hriâm ƀă hnê mơjiâng tuăn ngôa rơkê tơring Kon Plông ăm ‘nâi, ‘nâi nhên tơdroăng tơnêi tơdro cho túa um mơhno tơdroăng kong prâi ôh tá tơniăn pá vâ ‘nâi hdrối ƀă kô pro lŭp hên tơmeăm ƀă hlâ mơngế, hdrối hơnăm hriâm nếo 2024-2025, kơvâ ngăn hnê hriâm tơring hiăng tơrŭm ƀă mâu tíu pêi cheăng khu râ hbrâ tơdroăng vâ ví xía vâ xua tơnêi tơdro hnê ăm mâu vâi o hok tro ƀă thái cô.